Erindi um stíflur og áhrif þeirra

Margir hafa lýst yfir áhyggjum af afdrifum fiskistofna í Þjórsá verði af fyrirhuguðum virkjunum í neðanverðri ánni. NASF hefur sent frá sér fréttatilkynningu um fróðlegan fyrirlestur um málefnið.

Í tilkynningunni stendur m.a. eftirfarandi: „Ágætu landeigendur, stangveiðimenn og aðrir hagsmunaaðilar: NASF - Verndarsjóður um laxastofna vill vekja athygli á háskólafyrirlestri sem haldinn verður í næstu viku, fimmtudaginn 3. nóvember, 2011: Fyrirlestur um stíflur í ám og tilraunir til að greiða för sjógöngufiska á áhrifasvæðum stíflumannvirkja verður haldinn í Háskóla Íslands kl. 12:00.

Fyrirlesari er dr. Margaret J. Filardo líffræðingur, forstöðumaður Fiskvegamiðstöðvarinnar (Fish Passage Center) í Oregonfylki í Bandaríkjunum.

Miðstöðin er vísindaleg tæknistofnun þar sem fylgst er með ferðum gönguseiða og fullorðinna fiska. Tilefni fyrirlestursins er að nú stendur yfir opið umsagnarferli um drög að þingsályktun iðnaðarráðherra og umhverfisráðherra um verndun og nýtingu náttúrusvæða með áherslu á vatnsafl og jarðhitasvæði. Umsagnarferlinu lýkur 11. nóvember nk. og fer málið þá í kjölfarið til meðferðar Alþingis. Áherslan í þessu ferli beinist m.a. að villtu laxa- og sjóbirtingsstofnunum í Þjórsá og áhrifum virkjana í neðri hluta árinnar á þá.

Fyrirlesturinn er haldinn á vegum Verkfræði- og náttúruvísindasviðs Háskóla Íslands, Stofnunar Sæmundar fróða og NASF, Verndarsjóðs villtra laxastofna og er öllum opinn. Hægt er að tilkynna þátttöku til [email protected]"