Fengu væna sjóbirtinga á Pheasant Tail

Ágæt veiði hefur verið í Eldvatnsbotnum undanfarið. Ríflega 80 sentímetra langir sjóbirtingar hafa veiðst. Fyrir nokkrum dögum fengust fjórir á Pheasant Tail púpu.

„Aðeins er veitt á tvær stangir í Botnunum og er aðgengi mjög þægilegt fyrir veiðimenn, enda vegur niður að veiðimörkum við Eldvatn," segir á vef Stangaveiðifélags Reykjavíkur. „Holl sem var við veiðar dagana 24-26. september fékk þrettán fiska og dagarnir 28-30. september gáfu níu. Þá gaf ein morgunvaktin þann 4. október fimm stóra sjóbirtinga sem allir féllu fyrir litlum púpum veiddum andstreymis. Voru þar á ferðinni birtingar að 86 sentimetrum. Annar 84 sentimetra fiskur veiddist skömmu áður."

Á vef SVFR segir að mesta veiðin hafi verið á veiðistöðunum Beygjunni og Breiðunni. Sjaldan sé samt mikið af fiski á báðum stöðum á sama tíma

„Um er að ræða nánast samfellda veiðistaði, þannig að sjóbirtingurinn virðist færa sig nokkuð um set. Þannig sjá hollin ýmist mikið af fiski á Breiðunni, nú eða ekkert! Mun erfiðara er að veiða Beygjuna enda vatn hraðara en þar sem neðar dregur.

Þó hentar Beygjan einkar vel þeim sem veiða andsteymis með púpum og tökuvara. Það var raunin síðastliðinn fimmtudagsmorgun þegar að fjórir stórir birtingar fengust á Pheasant Tail púpu. Allir voru þeir vænir - og allir með nokkuð áberandi Steinsugusár á kvið. Einn veiddist svo í kjölfarið í Heljarhyl sem virðist einnig hafa verið nokkuð gjöfull nú á haustdögum."

[email protected]