Ytri-Rangá: Helgin gaf 57 laxa

Enn er ágætis veiði í Ytri-Rangá og sem dæmi veiddust 23 laxar í ánni í gær en 34 á laugardaginn.

Á vefnum lax-a.is segir að veiðin síðustu daga sé svipuð og hún hafi verið á sama tíma síðustu ár. Gera megi ráð fyrir því að október gefi 500 laxa í heildina.

"Veiðin hefur dreifst nokkuð vel á milli svæða nú í haust, bestu svæðin eru 1, 3, 4, 7 og 8 en svæði 2, 5 og 9 hafa verið lökust. Þetta er þó mjög breytilegt á milli daga," segir á vef lax-a.is.

Af þeim 23 löxum sem veiddust í Ytri Rangá í gær komu flestir á land á svæðum 3 og 4 eða sex á hvoru svæði. Það er athyglisvert að allir sex laxarnir sem veiddust á svæði 3 veiddust á flugu en bara einn af þeim sex sem komu á land á svæði 4 tók flugu. Hinir fimm tóku maðk.

Svæði 1 gaf fimm laxa í gær, þar af tóku tveir flugu. Svæði 7 gaf 4 laxa sem allir tóku maðk og svæði 8 gaf 3 laxa, einn af þeim tók flugu. Af þeim 23 löxum sem komu á land í gær tóku því 10 flugu og 13 maðk.

[email protected]