Veiðin í Affallinu orðin betri en í fyrra

Enn er að reitast upp lax í hafbeitaránum á Suðurlandi. Alls veiddust 89 laxar í Rangánum, Affallinu og Þverá.

Laxveiði er enn stunduð í fjórum ám á landinu eða Ytri-Rangá, Eystri-Rangá, Affallinu í Landeyjum og Þverá í Fljótshlíð. Allt eru þetta hafbeitarár.

Alls veiddust 35 laxar í Ytri-Rangá vikuna 10. til 17. október að því er fram kemur á vef Landssambands veiðifélaga - angling.is. Veiðin var því nokkuð minni en vikuna þar á undan þegar 60 laxar komu á land. Í heildina hafa veiðst 4.347 laxar í ánni en veitt er út mánuðinn. Í fyrra veiddust 4.961 lax í Ytri-Rangá.

Líkt og í Ytri-Rangá var vikan bara nokkuð góð í Eystri-Rangá miðað við árstíma en mjög kalt hefur verið undanfarna daga, næturfrost og aðeins nokkurra stiga hiti á daginn. Á land komu 43 laxar sem er mjög svipað og vikuna á undan þegar 47 laxar veiddust. Alls hafa nú veiðst 2.970 laxar í Eystri Rangá.

Níu laxar veiddust í Affallinu í vikunni og er heildarveiðin þar með orðin meiri en hún var í fyrra. Það verður að teljast til tíðinda þar sem langflestar ár, líklega yfir 90 prósenta þeirra, skiluðu langtum lélegri veiði í ár en í fyrra. Nú hafa sem sagt veiðst 478 laxar í Affallinu en í fyrra komu 476 á land.

Tveir laxar veiddust í Þverá í Fljóthlíð í vikunni og er heildarveiðin komin í 275 laxa samanborið við 119 í fyrra.

[email protected]