Ríflega hundrað laxar veiddust í Rangánum

Samtals veiddust um 100 laxar í Rangánum vikuna 3. til 10 október. Botninn er hægt og rólega að detta úr laxveiðinni enda aðeins veitt í örfáum ám.

Laxveiði er nú lokið í flestum af þeim 75 ám sem Landssamband veiðifélaga birtir reglulega tölur frá. Enn er veitt í sex ám en þess ber þó að geta að í Laxá í Kjós og Grímsá er fyrst og fremst verið að veiða sjóbirting þó einn og einn lax slæðist með.

Sextíu laxar veiddust í Ytri-Rangá í vikuna 3. til 10. október. Heildarveiðin er nú komin í 4.312 laxa en lokatalan í fyrra var 4.961 lax. Veitt er til 20. október í Ytri-Rangá og má benda áhugasömum veiðimönnum á að enn er töluvert um laus veiðileyfi og eru stöngin á sérstöku afmælistilboði eins og sjá má á agn.is.

Vikuveiðin í Eystri-Rangá var 47 laxar. Alls hafa nú veiðst 2.927 laxar í ánni en í fyrra skilaði Eystri-Rangá 4.387 löxum.

Í Laxá í Kjós veiddust þrír laxar í síðustu viku er heildartalan komin í 528 laxa samanborið við 1.112 í fyrra. Í Grímsá veiddust fjórir laxar í síðustu viku og hefur áin því skilað 481 laxi í heildina samanborið við 1.344 í fyrra.

Tólf laxar veiddust í Affallinu í Landeyjum í síðustu viku. Þar með hafa veiðist 469 laxar í ánni í ár sem er svipað og í fyrra þegar 476 laxar veiddust í ánni. Í Þverá í Fljótshlíð veiddust þrír laxar í síðustu viku og í heildina hefur áin því skilað 273 löxum á land. Í fyrra veiddust 119 laxar í Þverá.

[email protected]