Bleikjan horfin úr Tungufljóti?

Laxarækt í Tungufljóti í Biskupstungum er sögð hafa hafa hrakið bleikju sem þar var meira og minna á braut. Deilur hafa verið um svokallaða Tungufljótsdeild á vatnasvæðinu.

Í frétt frá í sumar á vefnum tungufljot.is er greint frá því að síðustu tíu árin hafi reglulega verið kafað niður í Tungufljótið fyrir landi Bergsstaða. Sé það meðal annars gert til að kanna hvort kominn sé fiskur og hvar hann haldi til.

"Fyrstu árin var hægt að ganga að bleikjunni vísri á sínum stöðum en það breyttist eftir að laxinum var sturtað í ánna. Í vikunni var kafað niður ánna, skyggni var gott og helstu veiðistaðir skoðaðir sérstaklega, því miður var áin líflaus auðn – ekki einn einasti fiskur. Á þeim stöðum þar sem bleikjan hefur haldið sig var ekkert að sjá," sagði á tungufljot.is.

Í annarri frétt rúmri viku síðar var greint frá "árlegum könnunarleiðangri" fyrir landi Bergsstaða. Útkoman var ekki uppörvandi:

"Að vanda var áin ísköld en einstaklega tær. Helst bar fyrir augu sóðaskap eftir golfara en golfkúlur eru niður eftir allri á. Í stuttu máli þá sást ein bleikja á einum helsta laxveiðistaðnum annars var engan fisk að finna," segir á tungufljot.is.

Eigandi Bergsstaða er Vilhjálmur Einarsson. Hann segir að vegna stofnunar sérstakra deildar um veiðina í Tungufljóti sem hafi allur silungur verið hrakinn af vatnasvæðinu. Með nýju frumvarpi um breytingar á lögum um lax- og silungsveiði standi til að auka sjálfstæði deilda innan veiðifélaga, þannig að þær geti tekið yfir nær öll verkefni veiðifélaga.

"Ekki verður annað séð en þetta sé gert til að reyna að réttlæta starfsemi deilda sem hafa farið langt út fyrir það sem gildandi lög leyfa," segir á tungufljot.is, sem er vefur er Vilhjálmur heldur úti. Hann segir að breytingin feli í sér að stofna megi sér deildir sem ákveði fjölda seiða og allir verði að vera með. "Síðan er þetta leigt út á okurverði," segir Vilhjálmur.

[email protected]





Aths. Það skal áréttað að Vilhjálmur Einarsson er ekki eini eigandi Bergsstaða. Meðeigendur hans að jörðinni eru Jónína G Einarsdóttir, Ólafur G E Sæmundsen og Einar E Sæmundsen.

- gar