Hafa fengið 1,4 milljarð króna í arð

Á 40 árum hefur Veiðifélag Grímsár og Tunguár fengið greiddar 1.400 milljónir króna í arð. Þetta kemur fram í ítarlegu viðtali við Þorsteinn Þorsteinsson, frá Skálpastöðum, í Veiðimanninum sem kom út fyrir skömmu.

Í viðtalinu fer Þorsteinn meðal annars yfir feril sinn sem formaður Veiðifélags Grímsár og Tunguár en því starfi gegndi hann í 40 ár áður en hann hætti á síðasta ári.

Í tilefni af því að veiðifélagið fagnaði 40 ára afmæli á síðasta ári þá tók Þorsteinn sig til og reiknaði út hve miklum arði leigan á ánni hefði skilað félaginu á þessum fjórum áratugum. Við skulum grípa hér niður í viðtalið:

„Ég tók mig til að framreiknaði arðgreiðslur hvers árs fyrir sig miðað við vísitöluna 2011 og ég held að flestir hafi orðið hissa á niðurstöðunni. Hún var 1.400 milljónir króna og það munar um minna fyrir ekki stærra samfélag," segir Þorsteinn í viðtalinu.

„Fyrir vikið verð ég alltaf dauðhræddur þegar ég heyri umræðuna um að allt það, sem ekki er í einkaeigu, sé þjóðareign. Ég óttast að ríkið fari að ásælast veiðiréttinn í ánum en vítin eru til að varast þau. Í flestum löndum þar sem ríkisvaldið hefur komist með puttana í veiðirétt hefur sigið hratt á ógæfuhliðina fyrir ánum og stofnunum."

[email protected]