SVFR leitar að bestu veiðimynd 2015

Uppskeruhátíð Veiðimannsins fer fram í Þróttaraheimilinu fimmtudaginn 29. október milli kl. 20-24.

Á hátíðinni munu veiðimenn fagna frábæru veiðisumri saman, segja sögur og hafa gaman. SVFR hvetur veiðimenn til að deila skemmtilegum veiðimyndum frá sumrinu á uppskeruhátíðinni en besta myndin verður valin og hlýtur að launum 50.000 króna inneign upp í veiðileyfi á svæðum SVFR veiðisumarið 2016. Sendu okkur mynd á netfang ritstjóra Veiðimannsins,[email protected], segðu okkur hver er á myndinni , hvar hann var að veiða og hvað fiskurinn tók. Veiðilegustu myndirnar verða birtar í jólablaði Veiðimannsins sem kemur út í desember.

Hver er stórlax ársins 2015?

Stórlax ársins fær sérstaka viðurkenningu á uppskeruhátíðinni en dregið verður úr nöfnum veiðimanna sem slepptu tveggja ára laxi á svæðum SVFR í sumar. Stangaveiðifélag Reykjavíkur hvetur veiðimenn til að sleppa stórlöxum sem þeir veiða til að efla stofn þeirra en veiðimönnum sem leggja stund á veiða og sleppa á Íslandi fer fjölgandi. Stærsti lax sem veiddist á svæðum SVFR veiðisumarið 2015 kom úr Haukadalsá og var 102 cm en allir þeir sem slepptu stórlaxi á svæðum SVFR í sumar koma til greina sem stórlax árins! Sá sem hreppir hnossið fær að launum 50.000 króna inneign upp í veiðileyfi á svæðum SVFR veiðisumarið 2016.

Stangaveiðifélag Reykjavíkur hvetur alla veiðimenn til að mæta á uppskeruhátíð Veiðimannsins og gera veiðisumarið upp á léttu nótunum í góðum félaxskap.