Typpi í öllum sínum stærðum og gerðum

Menn pæla í typpum, það er staðreynd. Kannski réttara að segja að þeir pæla mest í sínu eigin typpi og bera það svo saman við typpin í nærumhverfinu. Oftar en ekki eru það ekki strákarnir í sturtu sem eru í samanburðarhlutverki heldur karlarnir á skjánum.

(Kannski rétt að bæta því við að eini raunhæfi samanburður lima er í fullri reisn og svo segir mér hugur um að það sé óvinsælt meðal gagnkynhneigðra karla að mönnum rísi hold í almenningssturtuklefum.)

Mennirnir á skjánum eru þessir með þennan risastóra. Meðallengd lims er um 13 sentímetrar á meðalmanni en typpastærð klámleikara er 24 sentímetrar.

Smá stærðarmunur.

Það er einmitt þetta með stærðina sem veldur einstaklingum hugarangri. Sérstaklega ef hann er talinn of lítill. Þá komum við að því, hvað er lítið? Ef samanburðurinn er óraunhæfur, hver er þá mælistikan?

Svo eru konur spurðar hvort ekki sé betra að hafa meira frekar en minna. Þá vandast málið því líkamsímynd, sjálfstraust og kynferðisleg frammistaða hangir á sömu spýtunni. Ef þú ert með minnimáttarkennd yfir litlum lim þá hefur það áhrif á líkamsímynd þína sem svo hefur neikvæð áhrif á frammistöðu í bólinu. Það er eiginlega ekki hægt að vinna.

Stór limur er talinn merki um karlmennsku, einhvers konar úberman, þar sem samasemmerki er á milli þess að hafa langt typpi og að vera mikill karlmaður. Raunin er sú að það er flókið að vera með stóran lim. Því stærri sem hann er, því meira af honum stendur fyrir utan aðalpartíið því hann einfaldlega kemst ekki allur fyrir.

Við þurfum að breyta því hvernig við tölum um typpi, frammistöðu og kynlíf. Það er ekki til skapalón yfir hinn fullkomna lim. Fólk er alls konar og flestir bólfélagar beita bæði munni og höndum í kynlífi en treysta ekki eingöngu á hverfulan lim. Sem betur fer. Kynlíf fellur ekki og stendur með typpinu.

Ef fólk festist í þeirri hugsanagildru þá getur kynlífið ekki verið upp á marga fiska. Kynferðisleg frammistaða byggist á tengslum á milli bólfélaga, afslöppun, vellíðan, sjálfstrausti og einlægni.

Gott kynlíf er ekki mælt út frá reglustiku heldur ykkur sem stundið það.