Ertu á leiðinni í sumarfrí?

Ein stærsta ferðahelgi ársins er að renna upp, fyrsta helgin í júli. Stór hluti landsmanna ákveður að gera sér dagamun, fara í ferðalag og upplifa eitthvað annað en sama gamla hversdagsleikann.

Á svona ferðalögum eru vegasjoppurnar oft vinsælir áfangastaðir til þess að næra sig, fara á klósettið og teygja aðeins úr líkamanum. Í vegasjoppunum er þó oft lítið um hollan mat og fara fjölmargir þá leið að fá sér bara eina með öllu, kók og prins, hamborgara og franskar eða eitthvað álíka óhollt.

Getum við ekki gert aðeins betur og mögulega fengið skemmtilegri upplifun í staðinn? Vissulega kostar það örlítið meiri fyrirhöfn en að skreppa í sjoppuna en það er svo sannarlega þess virði.

Útbúðu hollt nesti

Þegar kemur að því að gera hollt nesti er undirbúningur aðalatriðið. Farðu tímanlega í búðina og keyptu þau hráefni sem þig vantar.

Ég mæli með því að útbúa hollar samlokur. Ég kaupi alltaf gróft brauð sem inniheldur góðar og hollar trefjar og á það set ég ýmist helling af grænmeti og eitthvað til að bleyta aðeins upp í brauðinu eins og pestó eða smurost, eða hollt túnfisksalat sem er í miklu uppáhaldi hjá mér.

Í það set ég eftirfarandi hráefni:

1 dós túnfiskur

1 lítil dós kotasæla

Smátt saxaður rauðlaukur

Avókadó eða egg

Pipar og smá hvítlaukskrydd

Ég mæli svo líka með því að hafa nóg af ávöxtum og grænmeti, eins og t.d. gulrótum og gúrkubitum með, sem og ferskum safa og vatni.

Snætt undir berum himni

Þegar meginuppistaða nestisins er holl skiptir ekki miklu máli þótt eitt súkkulaðikex eða prinspóló læðist með, bara svo lengi sem hollustan er í fyrirrúmi.

Það sem mér finnst svo frábært við það að taka með nesti er að maður þarf ekki að sitja inni á sveittum sjoppum þar sem braslyktin yfirgnæfir allt. Maður getur fundið sér fallega laut til þess að setjast í, sett teppi á grasið og notið náttúrunnar á meðan maður hleður batteríin fyrir næstu keyrslu.