Hatursummæli Óttar Guðmundsson skrifar 10. desember 2016 07:00 Íslendingar hafa frá landnámi verið móðgunargjörn þjóð. Gamlar lögbækur geyma alls kyns ákvæði um móðgandi ummæli og viðurlög við þeim. Hjalti Skeggjason var dæmdur fyrir níð um gömlu goðin í umróti kristnitökunnar. Ódámurinn Skarphéðinn Njálsson móðgaði helstu höfðingja landsins á Þingvöllum með alvarlegum afleiðingum. Langvinn meiðyrðamál hafa um aldir verið þjóðarsport Íslendinga. Lögreglan hefur nú tilkynnt að hún muni leggja aukna áherslu á svokölluð hatursummæli. Nýlega var gefin út ákæra á hendur þekktum útvarpsmönnum sem töluðu svo gáleysislega um kynlífsfræðslu skólabarna að einhverjir móðguðust. Lögreglan hefur lengi búið við vaxandi niðurskurð. Daglega berast fréttir að illa gangi að sinna venjulegum útköllum. Rannsókn á kynferðisbrotum og fjármálamisferli gengur hægt fyrir sig sakir manneklu. Átta árum eftir hrun er enn verið að skoða flókin fjársvikamál. Sárafáir lögreglumenn sinna eftirliti í fjölmennum byggðarlögum þrátt fyrir mikla fjölgun ferðamanna. Í nýlegri skýrslu um löggæsluna stendur: „Lögreglan er ekki fær um að halda uppi ásættanlegri frumkvæðislöggæslu (sic) vegna fjárskorts og manneklu.“ Á þessum erfiðu tímum er gleðiefni að lögreglan skuli finna svigrúm til að eltast við móðganir á opinberum vettvangi. Herða þarf róðurinn og setja á stofn sérstaka deild innan löggunnar sem hefur eftirlit með fjölmiðlum, netinu, Facebook og kommentakerfinu. Þar sem lögreglan fær engar nýjar fjárheimildir verður að hagræða innan stofnunarinnar og hætta rannsókn á smáglæpum eins og ofbeldi, innbrotum og ölvunarakstri og einbeita sér að hatursummælum. Þjóðin mun skilja og fagna þessari forgangsröðun enda er komið til móts við aldagamla móðgunarfíkn Íslendinga. Fari einhver að væla um ritskoðun eða tjáningarfrelsi má umsvifalaust lögsækja viðkomandi fyrir að hafa móðgað ríkissaksóknara. Þessi grein birtist fyrst í Fréttablaðinu. Viltu birta grein á Vísi? Sendu okkur póst. Senda grein Óttar Guðmundsson Mest lesið Að undirbúa börnin okkar fyrir heim sem er að hverfa Halldóra Mogensen Skoðun Kveðjur úr Grafarvogi til þeirra sem kasta steinum úr glerhúsi Davíð Már Sigurðsson Skoðun Hvað er „furry“ annars? Jóhanna Jódís Antonsdóttir Skoðun Leiðsöguhundurinn Gaur gerir mig að betri manneskju Þorkell J. Steindal Skoðun Hollar skólamáltíðir fyrir loftslagið og líðan barna Laufey Steingrímsdóttir,Anna Sigríður Ólafsdóttir Skoðun Fimmtíu ár frá lokum Víetnamstríðsins Finnur Th. Eiríksson Skoðun Þeir greiða sem njóta, eða hvað? Jóhannes Þór Skúlason,Pálmi Viðar Snorrason Skoðun Hljóð og mynd íslenskra varna Arnór Sigurjónsson Skoðun Jafnaðarmennskan og verkalýðsbaráttan Sigfús Ómar Höskuldsson Skoðun Hvað er að frétta af humrinum? Jónas Páll Jónasson Skoðun
Íslendingar hafa frá landnámi verið móðgunargjörn þjóð. Gamlar lögbækur geyma alls kyns ákvæði um móðgandi ummæli og viðurlög við þeim. Hjalti Skeggjason var dæmdur fyrir níð um gömlu goðin í umróti kristnitökunnar. Ódámurinn Skarphéðinn Njálsson móðgaði helstu höfðingja landsins á Þingvöllum með alvarlegum afleiðingum. Langvinn meiðyrðamál hafa um aldir verið þjóðarsport Íslendinga. Lögreglan hefur nú tilkynnt að hún muni leggja aukna áherslu á svokölluð hatursummæli. Nýlega var gefin út ákæra á hendur þekktum útvarpsmönnum sem töluðu svo gáleysislega um kynlífsfræðslu skólabarna að einhverjir móðguðust. Lögreglan hefur lengi búið við vaxandi niðurskurð. Daglega berast fréttir að illa gangi að sinna venjulegum útköllum. Rannsókn á kynferðisbrotum og fjármálamisferli gengur hægt fyrir sig sakir manneklu. Átta árum eftir hrun er enn verið að skoða flókin fjársvikamál. Sárafáir lögreglumenn sinna eftirliti í fjölmennum byggðarlögum þrátt fyrir mikla fjölgun ferðamanna. Í nýlegri skýrslu um löggæsluna stendur: „Lögreglan er ekki fær um að halda uppi ásættanlegri frumkvæðislöggæslu (sic) vegna fjárskorts og manneklu.“ Á þessum erfiðu tímum er gleðiefni að lögreglan skuli finna svigrúm til að eltast við móðganir á opinberum vettvangi. Herða þarf róðurinn og setja á stofn sérstaka deild innan löggunnar sem hefur eftirlit með fjölmiðlum, netinu, Facebook og kommentakerfinu. Þar sem lögreglan fær engar nýjar fjárheimildir verður að hagræða innan stofnunarinnar og hætta rannsókn á smáglæpum eins og ofbeldi, innbrotum og ölvunarakstri og einbeita sér að hatursummælum. Þjóðin mun skilja og fagna þessari forgangsröðun enda er komið til móts við aldagamla móðgunarfíkn Íslendinga. Fari einhver að væla um ritskoðun eða tjáningarfrelsi má umsvifalaust lögsækja viðkomandi fyrir að hafa móðgað ríkissaksóknara. Þessi grein birtist fyrst í Fréttablaðinu.
Hollar skólamáltíðir fyrir loftslagið og líðan barna Laufey Steingrímsdóttir,Anna Sigríður Ólafsdóttir Skoðun
Hollar skólamáltíðir fyrir loftslagið og líðan barna Laufey Steingrímsdóttir,Anna Sigríður Ólafsdóttir Skoðun