Leit að braki farþegavélarinnar MH370 hefur nú formlega verið hætt eftir nærri þriggja ára árangurslausa leit.
Í sameiginlegri yfirlýsingu ástralskra, malasískra og kínverskra yfirvalda kemur fram að til þessa hafi engar nýjar upplýsingar komið fram sem sýni hvar vélina sé að finna. „Sökum þessa hefur neðansjávarleit eftir MH370 verið hætt,“ segir í yfirlýsingunni.
Vélin hvarf sporlaust þann 8. mars árið 2014 á leið sinni frá malasísku höfuðborginni Kuala Lumpur til kínversku höfuðborgarinnar Peking.
Þrátt fyrir að gríðarlega umfangsmikil leit hafi farið fram í Indlandshafi hefur vélin enn ekki fundist.
239 manns voru um borð í vélinni, þar af 153 Kínverjar.
