Fyrst var greint frá kostnaðinum við stráin í frétt á vef DV, sem hafði upplýsingarnar samkvæmt heimildum Eyjunnar. Þar kom einnig fram að stráin væru „höfundarréttarvarin“. Bjarni segist ekki vita nákvæmlega hvað felist í því.
„En það gæti þó verið þannig að þeir hafi ætlað að rækta þetta, garðyrkjumennirnir sem sáu um verkið, en svo hafi þeir komist að því að það mætti ekki.“
Eins og áður segir eru stráin flutt inn frá Danmörku en Bjarni segir að ekki sé óalgengt að keyptur sé gróður erlendis frá í framkvæmdum á vegum borgarinnar. Umrædd strá, sem samkvæmt frétt DV heita á íslensku dúnmelur, taldi Bjarni þó að væru keypt í gegnum gróðrarstöð hér á landi.
Bjarni segir enn fremur að farið verði yfir kostnaðinn við stráin, auk annarra kostnaðarliða, í innri úttekt borgarinnar á framkvæmdum við braggann. Töluvert hefur verið fjallað um framkvæmdirnar í fjölmiðlum en kostnaður við þær fór úr áætluðum 155 milljónum króna í 415 milljónir. Í sundurliðaðri kostnaðaráætlun hefur m.a. komið fram að kostnaður við náðhús nam 46 milljónum og þá kostaði niðurrif og hreinsun á húsum 26 milljónir. Þá hefur meirihlutinn í borgarstjórn sætt harðri gagnrýni af hálfu minnihlutans vegna málsins.
Féllust hendur
Dóra Björt Guðjónsdóttir oddviti Pírata og forseti borgarstjórnar hafði ekki séð reikning fyrir umræddum kostnaði þegar Vísir náði tali af henni í kvöld. Hún segir þó að hér sé ekki um að ræða vænlega ráðstöfun á skattfé Reykvíkinga.„Ég sá þetta áðan og mér féllust í raun bara hendur. Hér er augljóslega verið að fara illa með skattfé borgarbúa og það verður ekki liðið. Píratar hafa í raun talað fyrir því að það séu iðkuð fagleg og vönduð vinnubrögð og hér virðist vera ýmislegt sem þarf að bæta í stjórnkerfinu,“ segir Dóra Björt. Þá hafi Píratar byrjað að kynna sér málið strax og það kom upp, auk þess sem grasrót flokksins hafi boðað til fundar á laugardag þar sem fulltrúar Pírata munu svara fyrir braggakostnaðinn.
„Við erum búin að senda inn beiðni um afrit af öllum reikningum og það er bara verið að vinna þá beiðni í kerfinu, og við ættum að geta fengið aðgang að þeim upplýsingum innan skamms.“
Eins og áður segir hafa borgarfulltrúar minnihlutans gagnrýnt meirihlutann harðlega fyrir verkefnið, þar á meðal Kolbrún Baldursdóttir, borgarfulltrúi Flokks fólksins, Vigdís Hauksdóttir, borgarfulltrúi Miðflokksins, og Eyþór Arnalds, borgarfulltrúi Sjálfstæðisflokksins. Þau hafa öll furðað sig á kostnaðinum við stráin á samfélagsmiðlum í kvöld, líkt og sjá má hér að neðan.
Ekki náðist í Dag B. Eggertsson borgarstjóra í kvöld þrátt fyrir ítrekaðar tilraunir.
