Prófaði að grilla hamborgarhrygg

Alfreð Fannar Björnsson hefur mikla ástríðu fyrir að grilla og heldur úti síðu á Instagram undir nafninu BBQkongurinn en fylgjendur hans þar eru hátt í 4.000 talsins. Yfirleitt stendur hann ekki við grillið um jólin en hver veit nema breyting verði þar á í ár. 

Þeir sem fylgjast með Alfreð vita að hann er snillingur þegar kemur að því að grilla alls kyns góðgæti. Hann grillar nánast allt frá pitsum upp í pottrétti, steikur og eftirrétti. Hann segist aldrei hafa grillað jólamatinn en hann prófaði þó einu sinni að grilla hamborgarhrygg. Í forrétt var hann með grafið lambafille sem hann gróf sjálfur. 

„Ég gróf lambafilleið sex dögum áður en ég matreiddi það og kaldreykti það svo í 10 tíma með beyki­spónum. Ég bar það svo fram með klettasalati, sultuðum rauðlauk og balsamic-gljáa,“ segir Alfreð.

„Við hamborgarhrygginn gerði ég ekkert nema skera tígla í hann. Svo var hann grillaður á snúningsteini við 180 gráður og ég sprautaði malti á hann á 10 mínútna fresti. Þegar 15 mínútur voru eftir kynti ég grillið í botn og penslaði hrygginn með gljáanum. Lyktin á pallinum var unaðsleg, alveg eins og það væru komin jól.“

Grafið lambafille

700 g lambafille

Gróft salt

Kryddblanda:

6 msk. salt

2 msk. sinnepsfræ

2 msk. fennelfræ

2 msk. kóríanderfræ

3 tsk. rósapipar

2 tsk. svartur pipar

2 msk. oregano

2 tsk. rósmarín

2 tsk. timían

1 tsk. sykur

Klettasalat

Sultaður rauðlaukur

Balsamic-gljái

Lambafilletið saltað vel og látið liggja í salti í 3 tíma, svo er saltið skolað af. Kryddinu er blandað saman og kryddblöndunni nuddað vel á kjötið og það svo vakúm­pakkað og geymt þannig í 4 daga. Að því loknu er kjötið reykt í reyk­ofni í 10 tíma.

Áður en kjötið er borið fram er það skorið í þunnar sneiðar og lagt ofan á beð af klettasalati og sultuðum rauðlauk. Að lokum er balsamic-gljáa dreift yfir.

Grillaður hamborgarhryggur

Einn hamborgarhryggur

Malt

Gljái:

Púðursykur

Tómatsósa

Sætt sinnep

Púðursykri, tómatsósu og sætu sinnepi blandað saman til að búa til gljáa. Tíglar skornir í hrygginn og hann settur á snúningsstein. Grillið er stillt á miðlungshita og grillað þar til kjarnhitinn er 58 gráður. Á 15 mínútna fresti er malti sprautað yfir hrygginn. Þegar kjarnhitinn er orðinn 58 gráður er hryggurinn penslaður með gljáanum og grillið stillt á hæsta hita. Þegar kjarnhitinn hefur náð 62 gráðum er kjötið tekið af grillinu og hryggurinn látinn standa smástund.