Sögu­legur lestur á Vísi í eld­gosa­viku

Eldgosið í Geldingadal við Fagradalsfjall er helsta ástæðan fyrir þessum háu tölum. Gosið bætti í mikinn fréttaáhuga þjóðarinnar undanfarið vegna skjálftahrinunnar á Reykjanesi og kaflaskipti í kórónuveirufaraldrinum hér á landi. Þetta er næstmesta aðsókn sem mælst hefur í sögu Vísis sem fagnar 23 ára afmæli sínu um þessar mundir.

Stærsti miðill á Íslandi

Í skýrslum MMR um netmiðlanotkun Íslendinga kemur fram að Vísir hefur verið mest lesni miðill landsins allt frá síðasta hausti. Í mælingu á fyrsta ársfjórðungi kemur fram að 84% þjóðarinnar skoðar vefinn vikulega og 62% daglega. Þegar þessar tölur eru bornar saman við alla aðra miðla, hvort sem það er á vef, í útvarpi eða sjónvarpi, sést að Vísir er í fyrsta sæti.

Í vikulegum lestrarmælingum Gallup kemur fram að Vísir hefur verið mest lesni miðill landsins í átta vikur af þeim ellefu sem liðnar eru af árinu.

Á tímum þar sem falsfréttir og upplýsingaóreiða vaða uppi og óvissutímar eru fyrir hendi er full ástæða til að þakka það traust sem lesendur okkar hafa sýnt á þessum títtnefndu fordæmalausu tímum.

287 þúsund notendur á Íslandi

Fjöldi innlendra notenda á Vísi í yfirstandandi viku hefur verið í kringum 250 þúsund daglega, mest í gær þegar 276 þúsund sóttu okkur heim. Flestir fylgdust með aukafréttatíma vegna kynningar á hörðustu aðgerðum hér á landi í kórónuveirufaraldrinum. 

Stærsti dagur ársins á Vísi var þó liðinn föstudag, gosdaginn sjálfan, þegar Vísir greindi fyrstur stóru fréttamiðlanna frá upphafi eldgoss. 287 þúsund innlendir notendur sóttu vefinn heim þann daginn og flestir lásu fréttina hér að neðan. Þessi frétt var reglulega uppfærð með textalýsingu yfir helgina og alls lesin um 550 þúsund sinnum.

Meðal annarra frétta sem voru mikið lesnar var fréttaskýring um söngkonuna Britney Spears, hrakningasaga feðga sem ætluðu að skoða eldgosið, viðtal við Seltirning sem fann gamla byssu í garði sínum og fréttaskýring sem dró saman helstu upplýsingar um eldgosið aðfaranótt laugardags.

Vönduð fréttamennska

Starfsmenn fréttastofu Stöðvar 2, Vísis og Bylgjunnar eflast við stöðuga fjölgun lesenda á öllum aldri. Okkar markmið er auk þess að vera fyrst með fréttirnar að standa vörð um gildi góðrar fréttamennsku eins og komið er inn á í ritstjórnarstefnu okkar. 

Þá minnum við lesendur á að þeir geta haft áhrif á umfjöllunarefni á hverjum tíma og hvetjum við þá til að láta í sér heyra. Margt má betur fara og þá eru fallegar sögur sem er full ástæða til að segja. Við tökum á móti ábendingum af öllum toga í ritstjórnarpóstinum okkar, [email protected], og heitum fullum trúnaði varðandi þær. Þangað má sömuleiðis senda áhugaverðar myndir eða myndbönd. Beinn sími á ritstjórn er 512-5200. 

Allar fréttir á Vísi eru merktar fréttamönnum okkar. Með því að smella á nafnið ratar lesandi á heimasíðu blaðamannsins hvar finna má netfang hans og símanúmer til að hafa samband.

Þá minnum við á skoðanavettvang okkar þar sem daglega fer fram lífleg umræða. Lesendur geta skrifað greinar og þannig látið til sín taka. Greinar sendast á netfangið [email protected] ásamt höfundarmynd.

Vísir fagnar 23 ára afmæli sínu þann 1. apríl. Sögu Vísis voru gerð skil á nítján ára afmælinu fyrir fjórum árum eins og lesa má um hér. Þá má geta þess að fréttastofa Stöðvar 2, Vísis og Bylgjunnar var tilnefnd til þrennra blaðamannaverðlauna á dögunum.

Fréttin hefur verið uppfærð og því haldið til haga að Víkurfréttir í Reykjanesbæ greindu frá því að gos væri hafið tveimur mínútum á undan Vísi.