Bæði lið hafa beðið lengi eftir Íslandsmeistaratitli í körfubolta og á morgun mun biðinni ljúka hjá öðru þeirra.
Stuðningsmenn úr röðum Skagfirðinga hafa á samfélagsmiðlum gagnrýnt fyrirkomulag miðasölunnar, sem er í höndum Vals enda um heimaleik liðsins að ræða, og kjaftasögur verið í gangi um að miðar sem seldir voru á Hlíðarenda í gær hafi verið teknir til baka þegar í ljós hafi komið að um stuðningsmenn Tindastóls væri að ræða.
Valsmenn segja þetta einfaldlega dylgjur og rangfærslur.
Um 1.500 manns geta mætt í Origo-höllina annað kvöld, nema að leyfi fáist á síðustu stundu fyrir því að fjölga sætum. Valur ákvað að 500 þessara miða færu til Tindastóls sem selur miða klukkan 17 á Sauðárkróki í dag en þar var löng röð þegar byrjuð að myndast tveimur tímum fyrr.
#röðin á Króknum - miðasalan byrjar eftir tvo tíma pic.twitter.com/mwCvS6hHGy
— Sæþór Már Hinriksson (@dosidans) May 17, 2022
Sögðust styðja Val til að fá miða
Valsmenn settu hins vegar hina 1.000 miðana í sölu á Hlíðarenda í hádeginu í gær og þeir seldust strax upp. Valsmenn höfðu hugsað sér að þeir miðar yrðu fyrir stuðningsfólk Vals en í tilkynningu þeirra segir að tæplega 200 miðanna hafi engu að síður farið til stuðningsfólks Tindastóls sem hafi sagst styðja Val til að fá miða.
Í tilkynningunni segir einnig að starfsfólk Vals, stjórnarfólk og jafnvel börn þess hafi orðið fyrir ónæði vegna tengsla sinna við félagið síðustu daga og á það bent að það sé algjörlega óásættanlegt.
Ljóst er að þau sem ekki hafa hreppt miða á leikinn eru tilbúin að leggja ýmislegt á sig til að fá miða og auglýsingar á borð við þessa hér að neðan, frá markahæsta manni Bestu deildarinnar í fótbolta, eru ekki einsdæmi.
Tek við tilboðum og gef miða á Blika leik í leiðinni
— Ísak Snær Þorvaldson (@isaks10) May 17, 2022
Tilkynningu körfuknattleiksdeildar Vals má lesa hér að neðan.
Að gefnu tilefni
Á morgun fer fram fimmti og síðasti leikurinn í úrslitarimmunni um Íslandsmeistaratitilinn í körfubolta karla. Leikirnir til þessa hafa verið frábær skemmtun og góð auglýsing fyrir körfuboltann. Körfuknattleikdeild Vals þakkar öllum sem hafa mætt á leikina og stutt sín lið og öllum sjálfboðaliðum sömuleiðis.
Við í KKD Vals viljum hins vegar bregðast við óvæginni og ósanngjarnri umræðu um framkvæmd miðasölu sem hefur verið byggð á dylgjum og rangfærslum. Starfsfólk, stjórnarfólk Vals og jafnvel börn þeirra hafa orðið fyrir ónæði vegna tengsla sinna við félagið síðustu daga. Það er auðvitað algjörlega óásættanlegt.
Staðreyndir vegna miðasölu á þennan oddaleik:
1. Tindastóll fékk 500 miða til að selja. Þeir miðar eru seldir í Skagafirði kl. 17 í dag.
2. Í sérstakri Valssölu á Hlíðarenda í gær fékk stuðningsfólk Tindastóls 192 miða. Stuðingsfólk Tindastóls mætti í röðina og sagðist styðja Val til þess að komast yfir miða. Því hefur verið haldið fram að þessir miðar hafi verið endurgreiddir en það er ekki rétt. Miðunum var breytt í gestamiða. Tindastóll hefur því fengið 700 miða á þennan leik.
3. Lokuð miðasala á netinu fyrir ársmiðahafa og vildarvini Vals var einnig trufluð af stuðningsmönnum Tindastóls. Fólk sem fór inn á þá miðasölu og ekki er stuðningsfólk Vals fékk endurgreidda þá miða sem það komst yfir.
Þetta eru staðreyndir málsins.
Með körfuboltakveðjum og von um að fólk láti ekki kappið bera fegurðina ofurliði.
KKD Vals
