Eins og þeir sem þekkja Langá vita er laxateljari við fossinn Skugga og það er almennt talið að stærsti hluti göngunnar fari upp laxastigann og svo í gegnum teljarann en líklega fer engu að síður 20-30% upp fossinn þegar hann er í góðu gönguvatni eins og núna. Í fyrradag á kvöldflóðinu var stór ganga á ferðinni og þá fóru 200 laxar í gegnum teljarann og að' sögn leiðsögumanna við Langá var líka mikið af laxi að ganga upp fossinn.
Það er vika í næsta stóra straum og 14 flóð þangað til svo ef þetta er málið er Langá í góðum málum í sumar. Laxinn er þegar mættur á efsta svæðið sem í daglegu tali er kallað Fjallið en það svæði fer þó ekki í svæðaskiptingu fyrr en 200-300 laxar hafa gengið í gegnum teljarann við Sveðjufoss. Langá er í frábæru vatni og laxinn er að dreifa sér um ána svo það er ábyggilega mikil spenna í þeim sem eiga daga í Langá á þessu sumri.
