Meistara­deild Líf­lands í hesta­í­þróttum glæsi­leg að vanda

 Meistaradeildin í hestaíþróttum samanstendur af 7 liðum með 4-5 knöpum þar sem 3 úr hverju liði keppa hverju sinni. Þarna mæta bestu knapar og hestar landsins og keppa í 8 greinum yfir tímabilið. Eftir hverja grein er krýndur sigurvegari en einnig fer fram stigasöfnun og á lokakeppninni er krýndur stigahæsti knapinn ásamt stigahæsta liðinu.

Nú eru þrjár keppnir búnar og hefur keppnin verið gríðarlega sterk hingað til og ekki hefur það skemmt fyrir að áhorfendastúkan í HorseDay höllinni er iðulega þétt setin. Í vetur hefur Veisluþjónusta Suðurlands boðið upp á veitingar í veislusal reiðhallarinnar sem hafa vakið gríðarlega lukku meðal gesta og gefur fólki tækifæri til að njóta samveru, veitinga og hestakosts allt í senn. Keppninni er streymt beint á streymisveitu Alendis svo það eru ekki bara þeir sem mæta í HorseDay höllina á Ingólfshvoli sem njóta góðs af heldur eru það hestaaðdáendur um allan heim sem bíða í eftirvæntingu eftir hverri keppni til að fylgjast með beinni útsendingu Alendis.

Fimmtudaginn 29. febrúar síðastliðin var keppt í fimmgangi í boði Toyota Selfoss sem bauð öllum gestum frítt á viðburðinn. Margir sterkir hestar voru skráðir til leiks, miklir reynsluboltar innan um nýja og efnilega. Það var ljóst að hestar og knapar mættu vel undirbúnir til leiks. Þennan dag var einnig Alþjóðlegur dagur sjaldgæfra sjúkdóma og heilkenna og var gaman að sjá að einstaka knapar glitruðu fyrir Einstök börn. Það var Elísabet Sveinsdóttir, Sleipnisfélgi, sem fór af stað með að hvetja alla hestamenn að glitra fyrir félagið, en félagið stendur henni mjög nærri. Elísabet hafði samband við stjórn Meistaradeildar og óskaði eftir því að fá þau í lið með sér að vekja athygli á málefninu, bæði með því að hvetja knapa Meistaradeildarinnar til að glitra fyrir Einstök börn í keppninni ásamt því að færa verðlauna knöpum Drekahjarta til styrktar félagsins. Við viljum bæði þakka Elísabetu fyrir að vekja athygli á þessu einstaka málefni ásamt þeim knöpum sem sýndu því lit með því að glitra með hestum sínum þetta kvöld.

Að lokinni forkeppni í fimmgangnum voru það Ásmundur Ernir Snorrason og Askur frá Holtsmúla 1 sem leiddu en fast á hæla hans komu Teitur og Nóta frá Flugumýri II, Glódís Rún og Snillingur frá Íbishóli, Sigurður Vignir og Hlekkur frá Saurbæ, Árni Björn og Ísbjörg frá Blesastöðum 1A og Eyrún Ýr og Hrannar frá Flugumýri II sem öllu unnu sér keppnisrétt í A-úrslitum.

Það mátti búa sig undir spennandi fimmgangs úrslit en þegar komið var að loka atriðinu, skeiðinu, leiddu Eyrún Ýr og Hrannar frá Flugumýri II en þau komu síðust inn í úrslitin. Hvern glæsisprettinn á fætur öðrum mátti sjá og mikil spenna ríkti hver myndi standa uppi sem sigurvegari. Að lokum voru það reynsluboltarnir Eyrún Ýr og Hrannar frá Flugumýri II og ljóst að enn einn titillinn bættist í hús hjá þessu glæsilega pari, sigur í fimmgangi Meistaradeildar Líflands 2024. Í öðru sæti voru Sigurður Vignir og Hlekkur frá Saurbæ, Glódís Rún og Snillingur frá Íbishóli í því þriðja. Þar á eftir Ásmundur Ernir og Askur frá Holtsmúla I í því fjórða, Teitur og Nóta frá Flugumýri II í því fimmta og loks Árni Björn og Ísbjörg frá Blesastöðum II í því sjötta.

Liðakeppni kvöldsins sigraði lið Top Reiters með 54 stig en liðið var með alla sína knapa í úrslitum, þau Teit Árnason, Eyrúnu Ýri Pálsdóttur og Árna Björn Pálsson. Eftir fimmganginn leiðir Glódís Rún einstaklingskeppnina í með 28 stig en liðakeppnina er það lið Hestvits/Árbakka sem leiðir nokkuð örugglega með 130.5 stig.

Næsta mót er fimmtudaginn 15. mars næstkomandi þegar keppt verður í Gæðingalist. Gæðingalist er heldur frábrugðin venjulegum hringvallagreinum en sýna þarf vel þjálfaðan gæðing á listrænan hátt. Knapi fléttar saman gangtegundum og æfingum og sýnir í einni heild, jafnvægi, þjálni, kraft og fimi hestsins. Hesturinn þarf að vera rólegur en einbeittur, sýna framhugsun og vera taktfastur, frjáls og sveigjanlegur. Í fyrra var það Olil Amble og Glampi frá Ketilsstöðum sem sigruðu með eftirminnanlegri sýningu. Í ár megum við búa okkur undir glæsilega keppni þar sem ávallt fleiri eru að verða mjög færir í þessari grein en hún hefur þróast mikið síðustu ár og regluverkið orðið aðgengilegra.

Gaman að segja frá því að liðin hafa tækifæri til þess einu sinni yfir tímabilið að fá lánaðan utanaðkomandi knapa til að keppa fyrir hönd liðsins og er það reynslan að liðunum nýta sér það oft í gæðingalistinni. Olil kom sem villiköttur fyrir lið Hjarðartúns í fyrra og verður spennandi að sjá hvort við munum sjá marga slíka keppendur á föstudaginn.

Á föstudaginn ætlarBÍLASALAN BÍLFANG að bjóða áhorfendum frítt inn í HorseDay höllina á Ingólfshvoli. Veitingarnar verða á sínum stað á vegum Veisluþjónustu Suðurlands og því tilvalið að mæta tímanlega og gæða sér á veitingum bæði fyrir keppni og á meðan henni stendur. Þau ykkar sem ekki komast geta tryggt sér áskrift og horft áAlendis

​Sjáumst í HorseDay höllinni föstudaginn 15. mars.

Staðan í liðakeppni

1. Hestvit / Árbakki 130.5 stig

2. Ganghestar / Margrétarhof 118.5 stig

3. Hjarðartún 116.5 stig

4. Top Reiter 99 stig

5. Hrímnir / Hest.is 93.5 stig

6. Þjóðólfshagi / Sumarliðabær 73 stig

​7. Austurkot / Pula 61 stig

Staðan í einstaklingskeppni

1. Glódís Rún Sigurðardóttir 28 stig

2. Jakob Svavar Sigurðsson 22 stig

3. Aðalheiður Anna Guðjónsdóttir 17 stig

4. Ásmundur Ernir Snorrason 15 stig

5. Eyrún Ýr Pálsdóttir 12 stig

Dagskrá vetrarins:

● 25. janúar - Fjórgangur - 19:00 HorseDay Höllin Ingólfshvoli

● 8. febrúar - Slaktaumatölt - 19:00 HorseDay Höllin Ingólfshvoli

● 29. Febrúar - Fimmgangur - 19:00 HorseDay Höllin Ingólfshvoli

● 15. Mars - Gæðingafimi - 19:00 HorseDay Höllin Ingólfshvoli

● 30. mars - Gæðingaskeið og 150m skeið - 14:00 Selfoss Brávöllum

● 12.apríl - Tölt og 100 m skeið - 19:00 HorseDay-Höllin Ingólfshvoli - Lokahátið