Svona gæti bensín­stöðvar­reiturinn við Ægi­­síðu litið út

Á vef Yrkis segir að þátttakendur hafi tekið mið af Aðalskipulagi Reykjavíkur 2010 til 2040 sem sé í gildi fyrir lóðina og svæðið um kring. Tillögurnar er allar hægt að skoða á vef fasteignafélagsins Yrkis, dótturfélags Festi sem á lóðina.

Á vef Yrkis kemur fram að áhersla hafi verið lögð á útfærslu sem feli í sér aðlaðandi blöndun af íbúðabyggð, smærri atvinnurýmum og opnum svæðum sem féllu vel að nærumhverfinu. Hugmyndirnar hafa verið kynntar skipulagsyfirvöldum í Reykjavík og eru nú aðgengilegar öllum. Að loknu samráðsferli og yfirferð ábendinga verður ein tillaga valin til að þróa áfram og svo framkvæmdir hafnar.

Á vef Yrkis er jafnframt farið yfir aðdraganda verkefnis og ferli þess. Að lokinni greiningu hafi Yrkir ákveðið að efna til hugmyndaleitar. Óskað var eftir við þátttakendur að tillögur þeirra sýndu hönnun og útfærslu bygginga á lóð og samspil þeirra við nærumhverfi, blöndun íbúða og atvinnurýma, stærðir húsa, húsagerðir, efnisval, opin svæði og aðkomu. Jafnframt afmörkun íbúða og mögulegra atvinnurýma, stærð þeirra og fjölda, ásamt fyrirkomulagi á lóð með dvalarsvæðum, gróðursvæðum, bíla- og hjólastæðum.

Þrjár arkitektastofur voru valdar til þátttöku. Það eru Gríma arkitektar, Sei studio og Trípólí arkitektar. Á vef Yrkis segir að þátttakendur hafi tekið mið af Aðalskipulagi Reykjavíkur 2010 til 2040 sem sé í gildi fyrir lóðina og svæðið um kring. Tillögurnar er allar hægt að skoða á vef Yrkis.

Tjörn í miðjum kuðungi

Tillaga Grímu arkitekta kallast Kuðungurinn og er gert ráð fyrir því í tillögunni að þyrping húsanna verði í kuðungi. Vegna mögulegrar mengunar af svæðinu frá bensínstöðinni segir að nauðsynlegt sé að fjarlægja nokkuð mikið af jarðvegi og er gert ráð fyrir því að mynda einskonar tjörn þar í miðjunni.

„Miðja nýja kuðungsins er lítil tjörn sem er umlukin bryggju og setbekkjum. Hún liggur beint undir miðju núv. bensínstöðvar og frá henni liggja geislar sem ný íbúðarhús standa við,“ segir í tillögunni og að umhverfis hana verði miðlægur garður sem teygi anga sína upp á milli húsanna.

Þegar upp úr garðinum er komið teygir gróður sig áfram á milli nýju húsanna og mun þannig leysa af hólm malbikað plan bensínstöðvarinnar. Milli gróðurbeðanna verði svo hellulögð vistgata sem tengi svæðið við Ægisíðuna. Frá götunni er svo gert ráð fyrir því að opnast tvær tengingar við göngustíg sem á að liggja meðfram norðausturhlið lóðarinnar. Tengingar munu beina gangandi og hjólandi vegfarendum inn á lóðina.

Hvað varðar útlit húsanna segir í tillögunni að húsin muni endurspegla gömlu húsin á svæðinu á ýmsan máta.

„Form og grunnflötur húsanna er í takt við það sem gerist í kring. Þakformin skírskota í þök nágrannahúsa og húsahæðum er stillt í hóf,“ segir í tillögunni og að þrjú hús rísi hæst í þrjár og hálfa hæð frá götuhæð, með þökum sem halla niður í átt að núverandi byggð. Önnur hús eru einungis tvær hæðir.

Litlar fjölskylduíbúðir

Þá er gert ráð fyrir grænum lausnum í efnisvali eins og grasþökum á öllum húsunum. Gert er ráð fyrir hlutlausum litum í efnisvali auk þess sem leitast verður við því að hafa allar húshliðar lifandi þannig að nágrannar muni ekki upplifa bakhliðar á nýju húsunum.

Í húsunum verða bæði einstaklingsíbúðir og litlar fjölskylduíbúðir. Einhverjar verða á tveimur hæðum og verður aðgengi tryggt að íbúðum á jarðhæð með annað hvort skábrautum eða litlum pallalyftum. Gert er ráð fyrir bílastæðum, djúpgámum og hjólageymslum.

Virða fjölbreytta hönnunarhefð í Vesturbæ

Tillaga Sei Stúdíó heitir Samsíða og segir í henni að vilji sé fyrir því í að virða fjölbreytta hönnunarhefð sem er í Vesturbænum.

„Vesturbærinn, eins og við þekkjum hann í dag, byggðist upp með módernískum hætti, þegar Íslendingar voru rétt að byrja að hanna sín eigin hýbýli sjálfir. Frá funkishúsunum við Garðastræti, villurnar við Hofsvallagötu, raðhúsin, fjölbýlishúsin og verkamannaíbúðirnar, allt var þetta fyrst byggt í vesturbænum,“ segir í tillögunni og að þetta eigi að virða.

Dýr raðhús

Því eigi að byggja á reitnum ólík búsetuform sem megi flokka í þrjá flokka. Stúdíó- og litlar íbúðir, fjölbýlishús og svo raðhús á þremur hæðum. Gert er ráð fyrir því að raðhúsin verði í dýri kantinum en í þeim verði tvær íbúðir. Önnur á einni hæð og hin á tveimur. Þeirri hæð tilheyrir bílageymsla og stórar svalir.

„Tilvalið fyrir tvær kynslóðir sömu fjölskyldunnar. Að sama skapi viljum við bjóða þeim sem eru að taka sín fyrstu skref á fasteignamarkaðinum tækifæri, með litlum íbúðum og síðan eru það fjölbýlishús, sem eru kannski sterkasta hefðin í byggingarsögu vesturbæjarins. Allt verður þetta í boði fyrir væntanlega kaupendur eða leigjendur á nýuppbyggðum rei,“ segir í tillögu Sei Stúdíó.

Gert er ráð fyrir þröngum götum þannig hægt sé að ferðast um á bíl en þó tryggi hægari umferð. Enginn bílakjallari er undir húsunum og bílastæðum haldið í lágmarki samkvæmt leiðbeiningum frá Reykjavíkurborg.

Bensínstöð verður að kaffihúsi

Þriðja tillagan, frá Trípóli, hefur engan sérstakan titil. Þar er gert ráð fyrir að bensínstöðvarhúsið sem situr á lóðinni fái nýjan tilgang sem menningarmiðstöð eða kaffihús. Lagt er til að íbúðabyggðinni verði komið fyrir á lóðinni við bensínstöðina en í miðjunni verði að finna hverfistorg og garðar sem íbúar hafa afnot af saman og geta notað á góðviðrisdögum til að grilla.

Tekið er fram að stíga þurfi varlega til jarðar og tryggja að ný íbúðabyggð falli vel inn í núverandi hverfismynstur. Hæð nýrra húsa og þakform í tillögu Trípólí er því í samræmi við eldri hús. Reynt verður að lágmarka útsýnisskerðingu og skuggavarp, bæði á eldri byggð og innan þeirrar nýju.

Gert er ráð fyrir fimm litlum fjölbýlishúsum með samtals þrjátíu og einni íbúð og er gert ráð fyrir einu bílastæði fyrir hverja íbúð í bílageymslu í kjallara auk þriggja bílastæða fyrir atvinnurými.

Kjallaranum er komið fyrir að mestu undir nýbyggingum með fram Ægisíðu til að lágmarka jarðrask, lækka byggingarkostnað og til að tryggja útisvæði.

Hver íbúð á jarðhæð hefur að auki sinn eigin sérafnotaflöt sem stúkaður er frá sameiginlegum svæðum með gróðri.

Í tillögunni kemur fram að nýju húsin eru almennt tveggja hæða og að þakform þeirra eigi að kallast á við þök þeirra húsa sem standa þeim næst. Þannig er gert ráð fyrir því að húshlutar sem standi við Ægisíðu séu með bröttu mænisþaki líkt og flest hús sem standa þar í kring. Húshlutar við Hofsvallagötu séu með lægra mænisþaki og aðrir húshlutar kallist þannig á við einhalla- og flöt þök einbýlishúsa við Einimel.

Þá er einnig gert ráð fyrir því að við götuna sé fjölbýlishús með lyftu á tveimur til þremur hæðum auk kjallara þar sem hægt verður að leggja bílum og hjólum.

Innar á lóðinni verða svo lyftulaus fjölbýlishús, og byggir fyrirkomulag þeirra að nokkru leyti á fjórbýlishúsum sem byggð voru á Melunum á fimmta áratugnum, þar sem hver íbúð hefur sérinngang.

Efri hæð hefur anddyri á jarðhæð með eigin tröppur upp í íbúð. Þar með er engin sameign í þeim húsum og enginn kjallari en hvort tveggja lækkar byggingarkostnað og minnkar jarðrask á framkvæmdatíma.

Íbúðir eru skipulagðar með þeim hætti að alrými snúa almennt í suður eða vestur en svefn- og baðherbergi í norður og austur. Allar íbúðir hafa glugga í þrjár áttir og eru stærðir íbúða nokkuð fjölbreyttar, allt frá 60 fermetrum upp í 200 fermetra.

Tillögurnar er hægt að kynna sér betur á vef Yrkis. 

Bensínstöðvarsamningar

Töluvert hefur verið fjallað um bensínstöðvarsamninga borgarinnar undanfarna daga. Bæði í tengslum við innslag í Kveik á RÚV og ákall fulltrúa Sjálfstæðisflokks í borgarstjórn um mögu­leg „ó­þægi­leg hags­muna­tengsl“ borgar og RÚV. 

Borgin lauk samningum við öll olíufélögin um fækkun bensínstöðva í íbúahverfum árið 2022. Í stað bensínstöðvanna eiga að rísa íbúðir og atvinnuhúsnæði. Samningarnir voru hluti af loftslagsáætlun borgaryfirvalda. Stefna þeirra er að fækka bensínstöðvum um helming fyrir árið 2030.