„Skautadiskóið byrjar kl. 11 á morgun og það er varla hægt að hugsa sér betri byrjun á sunnudegi,“ segir Vilhelm Már Bjarnason, einn skipuleggjenda viðburðarins. „Við sem stöndum að þessu viljum auðvitað hvetja sem flest til að mæta, eiga góða stund með fjölskyldunni og styrkja gott málefni um leið.“
Undanfarin tvö ár hefur Þorsteinn Elfar æft íshokkí með Birninum. Fjölskylda hans tengist íshokkíhreyfingunni með margvíslegum hætti og situr Guðlaug Ingibjörg móðir hans m.a. í stjórn Íshokkísambands Íslands auk þess að vera íshokkídómari.
„Það kostar litlar 1.500 kr. á skautadiskóið og eru skautar innifaldir. Formleg dagskrá hefst kl. 11 en boðið verður upp á kökusölu, andlitsmálningu fyrir 500 kr. og ilmandi vöfflukaffi fyrir sömu upphæð. Einnig verður boðið upp á lukkuhjól en því er hægt að snúa fyrir 1.000 kr. og við lofum öllum vinningi. Um kl. 11.50 ætlum við svo skauta saman og þá mun Bjarni töframaður sjá um tónlist og skemmtun.“
Eins og gefur að skilja hvílir mikið álag á fjölskyldu Þorsteins Elfars. Á sama tíma finnst þeim líka mikilvægt að geta hlegið og brosað, séð það jákvæða við lífið og tilveruna og samglaðst öðrum. Hér fyrir neðan er texti sem móðir Þorsteins skrifaði til náins hóps um stöðuna.
„Þá er fyrsta vikan í þessu verkefni liðin. Það eru mjög margar hugsanir sem fara í gegnum kollinn mans þegar lífið úthlutar verkefni sem þessu. Ein af þeim hugsunum er t.d. hve ósanngjarnt það er að á sama tíma og samnemendur Þorsteins missa tennur þá verður hann að missa hárið vegna lyfjameðferðar.
En við ætlum að vera þakklát í þessari vegferð! Fyrst ber að nefna að vera þakklát fyrir greininguna - með hana er nefnilega hægt að gefa viðeigandi meðferð! Og sú meðferð er hafin!
Eitt að lokum - þótt allt þetta sé í gangi þá er mikilvægt að geta hlegið og brosað, séð þetta jákvæða við lífið og tilveruna og samglaðst öðrum. Ef við gefum okkur ekki smá tíma í það þá værum við bara í fúlum drullupitti næstu árin og það er engin þörf á að þyngja róðurinn neitt meira - bara horfa á þetta jákvæða og taka einn dag í einu ❤️ “
Bjarnarbúðin mun halda utan um söfnunina og ágóðinn rennur allur óskertur til Þorsteins Elfars og fjölskyldu hans. Auk þess mun helmingur andvirðis af seldum vörum merktum Birninum renna til söfnunarinnar.
Fyrir þau sem komast ekki, en vilja styrkja söfnunina, er hægt að leggja inn á reikning Bjarnarbúðarinnar, kt. 680818-1420 og reikningsnúmer 1161-15-200818. Skýring: ÞEH.
Nánari upplýsingar má finna á Facebook síðu viðburðarins.
