Ásgeir Örn Hallgrímsson var valinn maður leiksins eftir sigur Íslands á Makedóníu á EM í handbolta í dag. Hann skoraði sex mörk í tveggja marka sigri, 29-27.
Strákarnir byrjuðu illa í leiknum en Ásgeir Örn hélt okkar mönnum á floti fyrsta stundarfjórðunginn er hann skoraði þrjú af fjórum mörkum Íslands.
„Ég hitti á góðar mínútur í byrjun og það var ljómandi. Það var bara allt inni hjá mér,“ sagði Ásgeir Örn í samtali við Rúv eftir leikinn.
„En það var ekkert í þeirra leik sem kom okkur á óvart. Þeir drápu niður hraðann í leiknum með því að spila lengi og leiðinlega. Svo lauma þeir inn mörkum og þá urðum við óþolinmóðir.“
Ásgeir Örn fékk tækifæri til að skora mark á lokasekúnum Íslands þegar hann komst einn gegn markverði Makedóníu. En hann skaut yfir markið.
„Ég veit ekki hvað gerðist. Þetta var hrikalegt,“ sagði hann og brosti. „Ég var orðinn svo spenntur að skora að ég gleymdi að setja hann í netið.“
Ásgeir Örn: Gleymdi að setja hann í netið
Tengdar fréttir
Umfjöllun og myndir: Ísland - Makedónía 29-27 | Annar sigur strákanna í röð
Karlalandslið Íslands í handbolta er komið í annað sæti milliriðils 1 á Evrópumótinu í Danmörku eftir 29-27 sigur á Makedóníu á Evrópumótinu í Danmörku í dag. Liðið spilaði sinn slakasta leik á mótinu en landaði engu að síður sigri.
Guðjón Valur: Erfiðara en þetta átti að verða
Guðjón Valur Sigurðsson, landsliðsfyrirliði, var ánægður með stigin tvö sem Ísland fékk í dag fyrir sigur á Makedóníu í milliriðlakeppni EM í handbolta.
Aron: Þeir fengu blóð á tennurnar
"Þetta var mjög erfiður leikur,“ sagði landsliðsþjálfarinn Aron Kristjánsson eftir tveggja marka sigur Íslands á Makedóníu, 29-27, á EM í handbolta í dag.
