Lögreglan og leitarfólk hefur keyrt um slóða og stíga í grennd við höfuðborgarsvæðið á Kia Rio bifreið til að fá úr því skorið hvar er fært fyrir slíka bifreið. Vegurinn á Strandarheiði upp að Keili, þar sem björgunarsveitir stóðu fyrir mikilli leit síðustu þrjá daga, er malarvegur og frekar stórgrýttur. Hann reynist erfiður á köflum fyrir almenna fólksbíla. Margar ábendingar hafa borist lögreglu um mannaferðir á svæðinu um helgina.
Lögreglan hefur lagt alla áherslu á að kortleggja ferðir rauða bílsins sem Birna Brjánsdóttir var að öllum líkindum farþegi í, að morgni laugardagsins 14. janúar. Fram hefur komið að um fjórir tímar eru óútskýrðir af ferðalögum bílsins eftir að Birna Brjánsdóttir hvarf. Ásgeir Þór Ásgeirsson, yfirlögregluþjónn hjá lögreglunni á höfuðborgarsvæðinu, segir að vegna þessa rúma tímaramma komi stórt svæði til greina til leitar.
„Eins og staðan er núna þá erum við að tala um stóran hluta af suðvesturhorninu sem við getum ekki útilokað. Við erum að tala um Borgarnes, Selfoss og allt Reykjanesið. Svo má bara draga hring á milli.“
Þegar þetta er skrifað hafa alls 292 björgunarsveitarmenn tekið þátt í leitinni að Birnu Brjánsdóttur. Björgunarsveitirnar komu fyrst formlega að málinu á sunnudagskvöld. Sporleitarhundurinn Perla var fengin til að rekja slóð Birnu frá skemmtistaðnum Húrra en slóðin kólnaði við Laugaveg 31.
„Á mánudeginum var ákveðið að kalla út sérhæft leitarfólk og kanna mjög vel svæðið í 300 metra radíus frá þessum punkti þar sem slóðin hvarf. Það fólk fór inn í öll port, kjallara, ruslageymslur og ruslafötur. Það velti við hverjum steini,“ segir Þorsteinn G. Gunnarsson, upplýsingafulltrúi Landsbjargar.
Á mánudag var einnig leitað í Urriðaholti og í Flatahrauni þar sem farsími Birnu tengdist símamastri á gömlu slökkvistöðinni. „Á þeim tímapunkti höfðum við ekkert annað,“ segir Þorsteinn.
Seint á mánudagskvöld fundust Dr. Martens skór Birnu við Hafnarfjarðarhöfn. Þá fór mikið púður í að kemba höfnina. Átta kafarar frá ríkislögreglustjóra og Landhelgisgæslunni leituðu hennar í höfninni. Þá var notaður ómannaður dvergkafbátur sem ber nafnið Gavia og er íslenskt hugvit.
„Þetta er frábært tæki til að geta nánast ljósmyndað fyrir okkur botninn,“ segir Ásgeir Þór.
Í gær fór mesta púður björgunarsveitanna og lögreglu í að skipuleggja leit helgarinnar sem verður ein sú umfangsmesta sem ráðist hefur verið í. Björgunarsveitarfólk af Suðurlandi og Vesturlandi hefur verið kallað til leitarinnar og leitin hefur verið skipulögð í þaula. Hafa svæði verið útilokuð sem eru ófær bílum eins og Kia Rio sem notast var við.
„Í þessu máli eru vísbendingar af gríðarlega skornum skammti svo það er ekkert sem segir okkur að við eigum að bera niður á einum stað frekar en öðrum,“ segir Þorsteinn.
Lögregla og björgunarsveitir hafa nýtt sér leitarhunda við leitina að Birnu Brjánsdóttur. Sporleitarhundurinn Perla fékk lyktarsýni af Birnu áður en leitin hófst og rakti svo ferðir hennar frá Húrra að Laugavegi 31. Perla var einnig fengin til að leita hennar í Flatahrauni en án nokkurs árangurs.
Annars staðar hefur snjóflóðaleitarhundum verið beitt við leit. Hundarnir eru þjálfaðir til að leita að fólki á víðavangi.
„Þegar þeir merkja eitthvað þá er yfirleitt fótur fyrir því. Hvert einasta tilvik þar sem hundur gefur eitthvað til kynna er skoðað mjög gaumgæfilega,“ segir Þorsteinn G. Gunnarsson, upplýsingafulltrúi Landsbjargar.
Fréttin birtist fyrst í Fréttablaðinu.
