Hvorki Viðar Örn né restin af Maccabi-liðinu getur skorað í Evrópudeildinni

Viðar Örn Kjartansson og félagar hans í ísraelska liðinu Maccabi Tel Aviv töpuðu, 2-0, fyrir Slavia Prag á heimavelli í fimmtu umferð riðlakeppni Evrópudeildarinnar í kvöld.

Josef Husbauer skoraði bæði mörkin fyrir gestina frá Tékklandi í sitthvorum hálfleiknum og mætast því Slavia og Astana frá Kasakstan í úrslitaleik um sæti í 32 liða úrslitum í lokaumferðinni.

Maccabi er nú búið að spila fimm leiki í riðlakeppninni án þess að skora en liðið er með eitt stig af fimmtán mögulegum og var úr leik fyrir leikinn í kvöld.

Eðli málsins samkvæmt er íslenski landsliðsframherjinn Viðar Örn Kjartansson ekki kominn á blað frekar en restin af Maccabi-liðinu en hann hefur nú aðeins skorað eitt mark í tíu leikjum með Maccabi í Evrópudeildinni á undanförnum tveimur tímabilum.

Viðar Örn er búinn að skora fjögur mörk í tíu leikjum í deildinni og þá skoraði hann fjögur mörk í sjö leikjum í undankeppni Evrópudeildarinnar en riðlakeppnin virðist ekki ætla að vera honum gjöful þetta árið frekar en í fyrra.