Það skipti sem töluvert hefur verið fjallað um var 20. desember 2016 á Reykjanesbrautinni þegar Magnús ók bílnum á 183 kílómetra hraða, við erfiðar aðstæður, aftan á Toyota Yaris bifreið. Bíllinn hafnaði utan vegar og slasaðist ökumaður bílsins töluvert. Var Magnús dæmdur til að greiða honum 600 þúsund krónur í bætur.
Þá var Magnús dæmdur fyrir annað umferðarlagabrot en Héraðsdómur Reykjaness hafnaði kröfu héraðssaksóknara um að Tesla bifreið Magnúsar yrði gerð upptæk. Hann mun því að óbreyttu fá hana aftur en ekki hefur verið tekin ákvörðun um hvort dómnum, sem kveðinn var upp í gær, verði áfrýjað til Landsréttar.
Lögreglustjórinn á Suðurnesjum ákærði Magnús fyrir tvö vægari brot sín, þegar honum var gefið að sök að hafa ekið bílnum á 140 og 148 kílómetra hraða á Reykjanesbrautinni. Þeir ákæruliðir voru sameinaðir ákæru héraðssaksóknara sem ákærði hann fyrir aksturinn á 183 kílómetra hraða vestur Reykjanesbraut að morgni 20. desember 2016.
Hámarkshraði á Reykjanesbrautinni er 90 kílómetrar og ók Magnús því langt yfir leyfilegum hámarkshraða og auk þess of hratt miðað við aðstæður sem voru ekki góðar. Var slæmt skyggni vegna veðurs og myrkurs þennan þriðjudagsmorgun og Reykjanesbrauti blaut og hál í þokkabót.
Á móts við álverið við Straumsvík tók hann fram úr fjölda bifreiða án þess að sinna aðgæsluskyldu við framúrakstur þannig að minnstu munaði að árekstur yrði við bifreiðar sem komu úr gagnstæðri átt. Þannig raskaði hann umferðaröryggi á alfaraleið.
Samkvæmt ákæruliðnum, sem hann var sakfelldur fyrir, var hann á 183 kílómetra hraða skömmu áður en hann ók hægra framorni Teslunnar af miklum krafti á vinstra afturhorn Toyota Yaris sem ekið var í sömu akstursstefnu. Hafnaði Yarisinn utan vegar, skemmdist og bílstjórinn slasaðist.
Ökumaður Yaris-bílsins skall með höfuðið í stýri bifreiðarinnar og missti meðvitund um stund og hlaut 2,5 sentímetra langan skurð á efra augnloki hægra megin, bólgu á nefi og glerungssprungur á hægri framtönn og hægri hliðarframtönn efri góms. Var Magnús dæmdur til að greiða honum 600 þúsund krónur vegna slyssins en maðurinn hafði farið fram á eina milljón króna.
Í skýrslutöku sagði Magnús að möguleiki væri á að hnerri hefði orsakað það að hraði bílsins hefði skyndilega skotist upp í um 180 kílómetra hraða.
Blaðamaður Vísis fylgdist með málinu þegar það var til meðferðar í Héraðsdómi Reykjaness í desember síðastliðnum. Þar gerði ákæruvaldið kröfu um fjögurra til sex mánaða fangelsisvistar og sviptingu ökuleyfis í 12-15 mánuði.
Fór svo að Magnús var dæmdur í fjögurra mánaða skilorðsbundið fangelsi og sviptur ökuréttindum í tólf mánuði. Þá gerði ákæruvaldið sömuleiðis kröfu um að Teslan yrði gerð upptæk til að koma í veg fyrir að Magnús gæti framið enn fleiri brot á bílnum. Hann hefur endurtekið verið tekinn fyrir hraðaakstur hér heima og í Danmörku þar sem hann hefur búið.
Óli Ingi Ólason saksóknari og Haukur Örn Birgisson, verjandi Magnúsar, tókust á um þetta atriði fyrir dómi. Haukur Örn sagði að yrði það niðurstaðan væri um að ræða „dýrustu hraðasekt sögunnar“, en Teslan kostaði 25 milljónir króna. Dómurinn yrði að taka tillit til verðmæti bílsins.
Óli Ingi benti á móti á að ef dómurinn tæki mið af verðmæti bílsins væri verið að mismuna fólki eftir efnahag og þannig skapa veruleika þar sem ríkir geti ekið um eins og brjálæðingar. Dómurinn féllst ekki á kröfu ákæruvaldsins um upptöku bílsins og fær Magnús Tesluna aftur að óbreyttu, þ.e. kæri annar aðilinn ekki niðurstöðuna til Hæstaréttar sem gætir komist að annarri niðurstöðu.
Sömuleiðis var tekist á um það fyrir dómi hvort leggja mætti mælinguna á hraða Magnúsar, 183 kílómetrar, til grundvallar. Um var að ræða gögn úr bílnum en ekki af radarmæli lögreglu. Var tekist á um þetta sömuleiðis fyrir dómnum sem tók mælingarnar úr bílnum til grundvallar í niðurstöðu sinni.
Hin tvö umferðarlagabrotin sem Magnús var ákærður fyrir um leið og fyrrnefndan ofsaakstur voru radarmælingar lögreglu í tvígang 25. ágúst 2016. Í annað skiptið var Magnús á 148 kílómetra hraða og 140 í hitt skiptið. Var Magnús dæmdur fyrir annan hraðaksturinn því ekki þótti sannað að um bíl Magnúsar hefði verið að ræða í hitt skiptið.
Einnig grunaður um fjárdrátt
Málið er ekki það eina þar sem Magnúsar kemur við sögu hjá ákæruvaldinu hér á landi. Í september síðastliðnum tilkynnt stjórn United Silicon að hún hefði sent kæru til Embættis héraðssaksóknara vegna gruns um refsiverða háttsemi Magnúsar í starfi forstjóra United Silicon.
Er hann grunaður um að hafa gefið út reikninga í nafni fyrirtækis sem hét sama eða svipuðu nafni og það sem framleiddi búnað fyrir United Silicon. Hefur því verið haldið fram að Magnús hafi dregið sér rúman hálfan milljarð króna en Magnús hefur sjálfur þverneitað þessum ásökunum. Málið er enn til rannsóknar hjá embætti héraðssaksóknara.
