Héraðsdómur Suðurlands hefur framlengt gæsluvarðhald yfir karlmanni, sem grunaður er um að hafa valdið mannskæðum eldsvoða að Kirkjuvegi á Selfossi í lok október, um fjórar vikur. Mun maðurinn því sæta gæsluvarðhaldi allt til 27. desember næstkomandi.
Tveir létust í eldsvoðanum þann 31. október. Maðurinn viðurkenndi við yfirheyrslu lögreglu að hann hafi notað kveikjara til að kveikja í pappakassa í stofu á neðri hæð hússins skömmu áður en það varð alelda. Þá tjáði hann lögreglu að hann „væri bara morðingi“, að því er fram kom í úrskurði Landsréttar frá 15. nóvember síðastliðnum.
Maðurinn hafði áður verið úrskurðaður í gæsluvarðhald en sá úrskurður rann út í dag. Fallist var á framlengingingu gæsluvarðhaldsins að kröfu lögreglustjórans á Suðurlandi.
Húsið að Kirkjuvegi 18 gjöreyðilagðist í eldsvoðanum og var rifið um miðjan nóvember.
Gæsluvarðhald yfir manninum framlengt um fjórar vikur
Tengdar fréttir
Segir húsráðanda á Kirkjuvegi hafa kveikt í gardínum eftir rifrildi
45 ára gömul kona, sem handtekin vegna brunans á Kirkjuvegi á Selfossi þann 31. október, tjáði lögreglu á vettvangi að húsráðandi hefði kveikt í húsinu.
Viðurkenndi íkveikju og sagðist vera morðingi
Tveir létust í eldsvoðanum en manninum er gert að sæta gæsluvarðhaldi til 29. nóvember næstkomandi.
Dýrt að farga húsinu vegna asbestsins
Búist er við því að niðurrifi á húsinu við Kirkjuveg 18 á Selfossi ljúki í dag.
