„Ég ætla að vera eins og Raggi Bjarna og syngja þangað til ég verð 85 ára“

Sigga er ein af okkar allra ástsælustu söngkonum og er óhætt að segja að hún hafi komið víða við á þeim fjörutíu árum sem hún hefur verið í tónlistarbransanum. Má þar nefna Stjórnina, Eurovision, Söngvaborg og hennar árlegu jólatónleika.

Þannig hefur hún sungið sig inn í hug og hjörtu hverrar kynslóðarinnar á fætur annarri. Það var því vel við hæfi þegar hún hlaut heiðursverðlaun Hlustendaverðlaunanna nú um helgina.

„Mér er alveg sama hvort ég sé að spila fyrir áttrætt fólk eða þriggja ára börn, mér finnst þetta allt jafn yndislegt. Ég bara syng fyrir þá sem vilja hlusta og þannig hef ég alltaf hugsað þetta,“ segir Sigga.

Varð þjóðþekkt á einni nóttu

Sigga skaust upp á stjörnuhimininn á einni nóttu þegar hún söng inn á lagið Vertu ekki að plata mig með HLH flokknum. Hún segir það hafa verið stærsta vendipunktinn á sínum ferli þegar Björgvin Halldórsson leit við inn í hljóðver þar sem hún var að taka upp plötu með hljómsveitinni Kikk.

„Ég var eflaust að garga eitthvað á háu nótunum þegar hann kemur þarna inn og kíkir á okkur. Svo fæ ég símtal frá honum stuttu seinna að þeim vantaði rödd í eitt lag, hvort ég væri til í að prófa.“

Hún segir Björgvin því hafa verið mikinn örlagavald í sínu lífi. Eftir að lagið kom út hafi leiðin bara legið upp á við fyrir hana í tónlistinni.

„Ég veit ekki hvar ég væri ef ég hefði ekki kynnst honum. Ég veit hreinlega ekki hvort ég væri að syngja í dag eða hvort ég væri bara að gera eitthvað allt annað.“

Tilviljun hvernig hún byrjaði að syngja með Stjórninni

„Ég var svo hrikalega feimin, þannig fyrir mig var þetta algjört sjokk. Fyrstu skiptin sem ég var að koma fram titraði ég og svitnaði og það var varla að ég gæti þetta. En einhvern veginn hjálpaði söngurinn mér að taka þessa feimni í burtu.“

Eftir að Vertu ekki að plata mig sló í gegn byrjaði Sigga að syngja á Hótel Íslandi. Þar söng hún á meðan gestir snæddu kvöldverð og síðan tók hljómsveit við sem lék fyrir dansi langt fram á nótt - hljómsveit að nafni Stjórnin.

„Þá var önnur söngkona í bandinu, Alda Ólafsdóttir. Svo gerist það í kringum áramótin 88-89 að hún fær einhverja flensu og Grétar biður mig um að stíga inn fyrir hana. Ég geri það og stuttu seinna ákveður Alda að flytja til London og þá var mér var boðin staða sem söngkona sveitarinnar,“ segir Sigga sem vill meina að hún hafi verið leidd áfram í lífinu inn á þá braut sem henni var ætlað að feta.

Sjá einnig: Grétar segist strax hafa orðið sjúkur í Siggu Beinteins

Stjórnin varð svo ein vinsælasta hljómsveit landsins og er hún enn í fullu fjöri í dag rúmum þrjátíu árum síðar.

„Ég held það sé af því að þetta eru skemmtileg lög með einföldum texta, þannig það er einfalt fyrir fólk að syngja með. Svo var bandið náttúrlega svo stórt árið 1990, þannig að þau börn sem voru að fæðast þarna árin á eftir, þau alast upp við þessa tónlist og það eru þau sem eru að mæta á böllin núna. Það er alveg geggjað. Þetta er svo ótrúleg tilfinning að spila fyrir fólk sem kann alla textana og syngur með allan tímann, ég þarf varla að syngja.“

Fagnar afmælinu með stórtónleikum

Sigga ætlar að halda upp á þetta þrefalda stórafmæli eins og henni einni er lagið með stórtónleikum þann 7. maí í Eldborgarsal Hörpu. Þar mun hún koma fram ásamt níu manna hljómsveit og hinum ýmsu tónlistarmönnum og skemmtikröftum sem hún hefur unnið með í gegnum tíðina: Stjórnin, Björgvin Halldórsson, Friðrik Ómar, Regína Ósk, Jógvan, Guðrún Gunnars, Sigrún Eva, Erna Hrönn, Helga Braga og Bassi Maraj.

„Mér fannst ég verða að gera eitthvað að þessu tilefni og þá liggur auðvitað beinast við að halda tónleika. Ég ætla að taka þetta alla leið og hafa þetta alvöru! Markmiðið er að fólk skemmti sér og allir fari glaðir heim. Það er náttúrlega margt búið að gerast á þessum fjörutíu árum og að einhverju leyti mun ég fara yfir það,“ en nánari upplýsingar um tónleikana er að finna hér.

Það verður af nógu að taka enda hefur Sigga komið víða við á ferlinum. Hún hefur gefið út átta sólóplötur, sex plötur með Stjórninni og sjö Söngvaborg-diska, ásamt því að hafa haldið jólatónleikana Á hátíðlegum nótum síðustu tólf árin.

Hér að neðan má sjá flutning Siggu eftir að hún var heiðruð á Hlustendaverðlaununum um helgina.

Ætlar ekki að verða stirð uppi á sviði

Eftir öll þessi ár segist Sigga alltaf hafa jafn gaman að starfi sínu og hefur það aldrei hvarflað að henni að hætta.

„En skal alveg viðurkenna að það hafa komið tímabil í gegnum árin þar sem ég hef orðið þreytt á því að vera alltaf í burtu um helgar. Ég var alltaf að syngja á meðan aðrir voru í fríi, þannig fólk var bara hætt að bjóða mér í afmæli og svona því ég komst hvort sem er aldrei.“

Árið 2019 greindi Sigga frá því að hún hefði fengið blóðtappa eftir mörg ár af svefnlausum nóttum. Í kjölfarið tók hún meðvitaða ákvörðun um það að forgangsraða og setja sjálfa sig og heilsuna í fyrsta sæti.

„Ég er farin að hugsa miklu betur um sjálfa mig. Ég fer alla virka daga í ræktina, af því þegar kemur að úthaldi í söngnum þá skiptir máli að vera í þokkalegu formi. Ég tók mjög meðvitaða ákvörðun um það að ég ætla ekki að vera orðin stirð uppi á sviði, ég vil geta hreyft mig og gert allt það sem mér finnst skemmtilegt.“

Markmiðið að syngja jafn lengi og Raggi Bjarna og Tina Turner

„Ég held ég sé í mínu allra besta formi raddlega séð í dag. Ég er alltaf að ögra sjálfri mér. Ég ögra mér á hverju ári á jólatónleikunum mínum með því að taka einhver risa lög, bara til að athuga hvort allt sé ekki örugglega til staðar ennþá.“

Sigga segist ætla að halda áfram að syngja svo lengi sem röddin sé í lagi og fólk vilji ennþá hlusta. 

„Ég segi alltaf að ég ætli að vera eins og Raggi Bjarna, ég ætla að syngja þangað til ég verð 85 ára, eða þá Tina Turner sem söng síðasta konsertinn sinn 79 ára.“