Tilefnið er sala á 22,5 prósenta eignarhlut ríkisins í Íslandsbanka, en á skiltum mótmælenda sem voru um tíu talsins, mátti sjá skilaboð á borð við „Bankarán alla virka daga frá 9-16“ og „Bjarna burt!“. Því er nokkuð ljóst að krafa mótmælendanna virðist vera sú að Bjarni Benediktsson fjármálaráðherra segi af sér vegna bankasölunnar.
Lögregla hafði einhver afskipti af mótmælendum. Einn mótmælandi var handtekinn en hann hafði kveikt á blysi.
Ríkisstjórnarfundur dagsins er sá fyrsti síðan fyrir páska og jafnframt sá fyrsti frá því formenn ríkisstjórnarflokkanna þriggja greindu frá því að til stæði að leggja niður Bankasýslu ríkisins.
Í fyrri útgáfu fréttarinnar kom fram að mótmælendur hefðu staðið fyrir ráðherrabíl og komið í veg fyrir að hann kæmist leiðar sinnar. Það er ekki rétt og hefur verið leiðrétt.
