Jafnræði var með liðunum framan af leik, en Valskonur leiddu með sex stigum að loknum fyrsta leikhluta, 24-18. Áfram héldu ÍR-ingar í við Valskonur fram að hálfleikshléinu og var munurinn aðeins fimm stig þegar liðin gegnu inn til búningsherbergja, staðan 44-39.
Valskonum gekk illa að hrista nýliðana af sér og munurinn fyrir lokaleikhlutann var enn fimm stig. Valskonur settu þó í lás í fjórða leikhluta og skoruðu 21 stig gegn aðeins níu stigum gestanna og niðurstaðan því 17 stiga sigur Vals, 84-67.
Kiana Johnson átti frábæran leik fyrir Val og skoraði 22 stig, tók tíu fráköst og gaf tíu stoðsendingar. Greeta Uprus var stigahæst í liði gestanna með 21 stig.
