Fimmtíu bestu: Hetja úrslitanna 2002, Valdi Gríms 2.0 og þeir sem tóku frægustu vítaköstin

35. Halldór Sigfússon

Sjaldan hefur leikmaður lagt saman jöfn góð úrslitaeinvígi um Íslandsmeistaratitilinn og Halldór Sigfússon gerði 2001 og 2002.

Bæði árin réðust úrslitin um Íslandsmeistaratitilinn í oddaleik. Halldór spilaði því tíu leiki í úrslitum á þessum tíma. Markaskor hans eftir leikjum var eftirfarandi: 6, 10, 3, 4, 10, 8, 10, 11, 2, 8. Mörkin voru samtals 72, eða 7,2 að meðaltali í leik. Það er rugluð tölfræði miðað við að þetta var fyrir tíma 120 sókna leikja og í sumum þeirra var mjög lítið skorað.

Í úrslitunum 2001 var Halldór vængmaður fyrir eitt stykki Guðjón Val Sigurðsson en árið 2002 var hann aðalkallinn. Og hann þurfti að vera framúrskarandi þar sem hann var nánast eina sóknarógn KA fyrir utan Andrius Stelmokas. Halldór skoraði 39 mörk í úrslitunum 2002, Stelmokas 21 en næsti maður þar á eftir var aðeins með þrettán mörk.

KA varð að sætta sig við silfur 2001 en varð meistari ári seinna eftir sögulega endurkomu gegn Val. KA er eina liðið sem hefur orðið Íslandsmeistari eftir að hafa tapað fyrstu tveimur leikjunum í úrslitaeinvígi.

Halldór sneri aftur heim 2004 og varð markakóngur tímabilið 2004-05. Hann lék seinna með Fram áður en hann fór út í þjálfun. En fjöðurin í hatti hans sem leikmanns eru úrslitin 2001-02.

34. Óðinn Þór Ríkharðsson

Ef Árni Bragi Eyjólfsson er Bjarki Sigurðsson sinnar kynslóðar er Óðinn Þór Ríkharðsson Valdimar Grímsson sinnar kynslóðar. Líkt og Valdimar er Óðinn markagráðugri en allt og hefur allt að bera til að skora mikið. Hann er með mergjaða skottækni og eldsnöggur fram. Þá er hann góður á ögurstundu eins og hann sýndi með KA á síðasta tímabili.

Það var nefnilega hans besta tímabil. Eftir þrjú ár í atvinnumennsku sneri Óðinn heim fyrir síðasta tímabil og líkt og Árni Bragi tímabilið 2020-21 var hann besti leikmaður deildarinnar og markakóngur hennar. Óðinn skoraði og skoraði og skoraði svo meira, með snúningum, vippum og þessum fáránlegu aftur á bak skotum sem hann lætur líta út fyrir að vera hin venjulegustu.

KA komst í bikarúrslit í fyrsta sinn í átján ár og lenti svo í mögnuðu einvígi gegn Haukum í átta liða úrslitum úrslitakeppninnar. Óðinn tryggði KA-mönnum sigur í fyrsta leiknum á Ásvöllum úr vítakasti eftir að leiktíminn rann út. Haukar unnu hins vegar næstu tvo leiki með samtals tveimur mörkum og fór áfram. Óðinn var magnaður í einvíginu og skoraði 29 mörk í leikjunum þremur.

Óðinn hóf ferilinn með HK og stökk í Safamýrina í eitt tímabil áður en hann fór í FH 2016. Þar var hann hluti af gríðarlega sterku liði sem varð deildarmeistari 2017 og komst í úrslit um Íslandsmeistaratitilinn 2017 og 2018. Óðinn var sérstaklega öflugur í úrslitakeppninni 2018 þar sem hann var með tæplega sjö mörk að meðaltali í leik.

Miðað við frammistöðu Óðins með íslenska landsliðinu að undanförnu verður þess eflaust langt að bíða að hann spili aftur í Olís-deildinni. En mikið svakalega var hann góður meðan hann spilaði hérna heima.

33. Jón Karl Björnsson

Jón Karl Björnsson átti tvennt sem kemur mönnum ofarlega á lista sem þennan; flott titlasafn og svo eftirminnilegt augnablik.

Mark hans fyrir Hauka gegn Aftureldingu á Ásvöllum 26. apríl gleymist seint. Jón Karl skoraði þá úr vítakasti með því að sparka boltanum með lærinu yfir markvörð Aftureldingar. Útfærslan var svo frumleg og óvenjuleg að enginn veit hvort markið átti að standa. En það gerði það sem betur fer.

Jón Karl er annars einn sigursælasti leikmaður í sögu efstu deildar. Hann varð sex sinnum Íslandsmeistari með Haukum og á því tímabili sem er hér til umfjöllunar vann hann ellefu stóra titla. Geri aðrir betur.

Jón Karl verður aldrei sakaður um að hafa verið í toppformi. En hann vann það upp með miklum hæfileikum og öryggi í færum og sérstaklega í vítaköstum. Og hann var nógu góður til að vera oftast nær byrjunarliðsmaður í besta liði landsins. Það er meira en flestir geta sagt.

32. Baldvin Þorsteinsson

Því miður tengja fæstir Baldvin Þorsteinsson við handbolta þessa dagana án þess að farið sé nánar út í sálma. En gaurinn var hörkuspilari, mikill keppnismaður og sigurvegari. Ásamt Róberti Aroni Hostert er Baldvin eini leikmaðurinn sem hefur orðið Íslandsmeistari með þremur liðum, allavega sem lykilmaður.

Baldvin kom fyrst fram á sjónarsviðið með KA og var hent út í djúpu laugina í úrslitaeinvíginu gegn Val 2002. Í fjórða leiknum, sem KA, varð að vinna var Roland Eradze búinn að fara ansi illa með sóknarmenn Akureyrarliðsins.

Þegar KA fékk vítakast undir lokin brá Atli Hilmarsson, þjálfari KA, þá á það ráð að senda nítján ára gamlan Baldvin á vítalínuna gegn besta markverði deildarinnar. Hann skoraði og tók svo annað víti sem KA fékk skömmu síðar. Þar sýndi Baldvin enn meiri yfirvegun, eða fífldirfsku, og „hausaði“ Roland. Hann skoraði fjögur af síðustu fimm mörkum KA sem vann leikinn, 17-16, og tryggði sér svo Íslandsmeistaratitilinn í Valsheimilinu í oddaleik.

Baldvin gekk seinna í raðir Vals, varð markahæstur í úrslitakeppninni 2004 þar sem Valsmenn enduðu í 2. sæti, tróð eftirminnilega í körfu í Valsheimilinu gegn Þór 2005 og varð svo Íslandsmeistari 2007 og bikarmeistari 2008 og 2009.

Baldvin fór síðan til FH og átti stóran þátt í því að liðið varð Íslandsmeistari 2011, í fyrsta sinn í nítján ár. Hjá FH skoraði hann minna en áður en var gríðarlega mikilvægur í vörninni.

31. Finnur Ingi Stefánsson

Herra áreiðanlegur og herra óhjákvæmilegur. Af hverju? Þú veist að þegar Finnur Ingi Stefánsson fer inn úr hægra horninu eru cirka áttatíu prósent líkur á að boltinn endi í netinu. Ótrúlega skotviss leikmaður og það er leitun að manni sem klárar færin sín af jafn mikilli sannfæringu og Finnur Ingi.

Eftir að hafa slitið handboltaskónun hjá Gróttu fór Finnur Ingi til Vals. Hann var eiginlega hjá Val á röngum tíma. Liðið vann reyndar tvo titla en þrjú af fimm tímabilum Finns Inga hjá því var það í verulegum vandræðum.

Finnur Ingi sneri aftur í Gróttu og var hluti af gríðarlegu sterku liði tímabilið 2015-16. Grótta, sem var þá nýliði, endaði í 5. sæti Olís-deildarinnar og komst í bikarúrslit. Auk Finns Inga voru leikmenn á borð við Viggó Kristjánsson, Aron Dag Pálsson, Þráinn Orri Jónsson og bróðir hans, Júlíus Þórir, í burðarhlutverkum hjá liðinu.

Eftir stutt stopp í Mosfellsbænum fór Finnur Ingi svo til Vals á nýjan leik 2019 og hefur síðan þá unnið sex stóra titla með liðinu. Finnur Ingi er óumdeildur fyrsti kostur í stöðu hægri hornamanns í langbesta liði landsins.

Finnur Ingi hefur verið einn af bestu leikmönnum í sinni stöðu, og stundum sá besti, í fjórtán tímabil og sýnt mikinn stöðugleika. Og það er fátt sem bendir til þess að hann sé eitthvað að fara að gefa eftir.