Góðan daginn, faggi á faraldsfæti: „Ögrandi að fara úr íslensku búbblunni“

Ráðstefna í Montreal kveikjan

„Þetta er risa stór listahátíð og við hlökkum mikið til,“ segir Bjarni og bætir við að þau hafi lengi verið spennt fyrir Fringe. Ferlið hófst þegar þau fóru á tengiliðaráðstefnu sviðslista í Montreal síðastliðinn nóvember.

„Þar kynntumst við fullt af fólki frá alls konar hátíðum úti í heimi, þar á meðal manni sem heitir Tom og er listrænn stjórnandi í leikhúsinu Summerhall í Edinborg.“

Bjarni segir að þeim hafi litist mjög vel á Tom og húsnæðið.

„Við lærðum líka svo mikið af því að hlusta á fyrirlestur hjá honum. Þannig að við sóttum um að vera hjá honum í Summerhall og fengum það strax í gegn.“

„Allt annað skrímsli á ensku“

Bjarni, Gréta Kristín og Axel Ingi skipa listhópinn Stertabenda og heitir á ensku Perplex Theatre Company. Þau hefur löngum langað út með verkið og segjast að mestu vera spennt þó svo að það hafi óvænt tekið á að þýða leikritið yfir á ensku.

„Ásamt því að þýða verkið þurftum við að stytta það niður í klukkustund. Við byrjuðum að æfa þetta í upphafi sumarsins og þetta var allt annað skrímsli á ensku,“ segir Bjarni og hlær.

„Maður þurfti að vinna alla vinnuna aftur og það var bara ógeðslega erfitt ef ég á að segja alveg eins og er, ég bjóst ekki við því. Ég hélt að ég myndi bara skella leikritinu yfir á ensku og læra það tiltölulega fljótt en þetta er allt annað. Það er einhver önnur tíðni og önnur tilfinningatenging við orðin og lögin og það var bara ótrúlega áhugavert. En ég hef rosa góða tilfinningu fyrir þessu núna.“

Margar hinsegin sýningar

Hann bætir við að þau séu búin að vinna vel að þessu og leggja mikla vinnu í þessar breytingar.

„Það er líka bara ótrúlega ögrandi að hugsa til þess að maður sé að fara úr íslensku litlu búbblunni og hoppa út í risastóra sjóinn sem er útlönd þar sem allt er á ensku. Svo eru ótrúlega margar hinsegin sýningar í gangi líka úti á hátíðinni sem verður mikill innblástur. 

Við ætlum að fara helst oft á dag á hverjum degi að sjá allt, hitta fólk og heyra þeirra pælingar. Núna er ég mjög vel stemmdur þó að ég hafi tekið smá bugunar tímabil í byrjun júní á fyrstu æfingunum. Það fylgir þessu.“

8 sýningar urðu að 115

Góðan daginn, faggi hefur með sanni slegið í gegn hérlendis en ásamt því að hafa sýnt fjöldann allan af uppseldum sýningum í Þjóðleikhúskjallaranum hefur leikhópurinn ferðast um landið og sýnt víðs vegar.

„Viðbrögðin hafa komið okkur mikið á óvart. Við héldum fyrst að við værum að fara að gera svona átta til tíu sýningar, núna eru þær komnar upp í 115 og inn í því eru tvö leikferðalög um landið þar sem við höfum heimsótt bæði grunn- og framhaldsskólana. Þetta er búið að vera ólýsanlegt ferli. Þvílík gjöf og forréttindi en auðvitað líka erfitt og alls konar. 

Að mestu leyti hefur þetta verið ótrúlega gaman en það var sérstaklega erfitt í fyrstu að æfa mig í að berskjalda mig svona. Svo stækkar þægindaramminn manns þegar maður fattar að maður er öruggur. 

Þá er þetta svo gefandi og magnað og það er alltaf sjúklega gaman að sýna. Ég get alveg gert 115 sýningar til viðbótar.“

Bók sem fer enn dýpra í hlutina

Það er margt spennandi í gangi hjá leikhópnum en ásamt því að vera búin að gefa út plötu við leikritið er Bjarni að vinna að því núna að skrifa bók sem kemur út fyrir jólin.

„Bókin er í raun leikritið í bókarformi nema tekið mikið lengra og farið mikið dýpra í hlutina. Allt sem var ekki pláss fyrir í sýningunni verður í bókinni. Svo verður Góðan daginn, faggi sýningin sýnd á RÚV á hinsegin dögum, sem er ótrúlega spennandi.

Það varð svona ákveðið móment þegar upptökurnar fyrir RÚV voru búnar. Þá hugsuðum við okei þetta er frábært rönn. Nú getum við einbeitt okkur að enskunni og séð hvert það tekur okkur.“

Spennandi tækifæri

Bjarni segist mjög opinn fyrir því að sýna meira erlendis.

„Við vitum af því að fólk frá alls konar listahátíðum er að koma á sýninguna okkar í Edinborg. Þar verða meðal annars forsvarsmenn listahátíða á borð við Dublin Gay Theatre og Sydney Fringe Festival sem eru að leita að verkum. 

Við ætlum samt bara að vera yfirveguð, við gerum allt ótrúlega vel og vitum það en auðvitað eru margar sýningar í gangi og fá spott sem eru í boði. Ég er því vongóður en með tempraðar væntingar og hlakka aðallega til að tengjast fólki þarna úti,“ segir Bjarni að lokum.

Hér má finna nánari upplýsingar um sýningartímana úti.