Taylor Swift partý­stemning í Smára­bíó í kvöld

Myndin heitir Taylor Swift: The Eras Tour og fjallar um tónleika Taylor Swift, sem er fræg söngkona frá Bandaríkjunum. 

Ólafur Þórisson, markaðsstjóri Smárabíós, segir í samtali við fréttamann að þátttakan hafi verið frábær og að um þúsund miðar hafi selst. Hann segir að það komi ekki á óvart af því það eru svo margir Taylor Swift-aðdáendur á Íslandi.

„Það er búið að hringja til okkar fólk og spyrja hvort það megi dansa og syngja á sýningunni. Ég get lofað því að það verður alveg svakaleg stemning í kvöld, mikið sungið og fólk á eftir að standa upp og dansa,“ segir Ólafur. 

Frítt í karaoke og tilboð á barnum

Verður eitthvað sérstakt í gangi út af frumsýningunni?

„Við ætlum að vera með frítt í karaoke, því við erum með svo flott karaoke herbergi. Ef þú ert með miða á Taylor Swift, þá geturðu komið frá 17 til 18:50 og tekið Taylor Swift lög og sungið eins og enginn sé morgundagurinn.“

Síðan verða líka tilboð á nammi og drykkjum. Á göngunum má heyra Taylor Swift-tónlist. 

„Við ætlum að vera í Taylor Swift ham í kvöld, og alla helgina. Mér sýnist helgin líta þannig út að það verði nóg að gera í Taylor Swift-málum,“ segir Ólafur. 

Það er hægt að kaupa miða í bíóklúbbsappinu, á Smárabíó.is eða koma niður í Smárabíó og kaupa miða þar. Ólafur segir að það sé nánast uppselt í kvöld en samt séu fleiri miðar til sölu á morgun. 

„Við erum búin að hvetja alla til að koma með armböndin sín. Swift-samfélagið á Íslandi er stórt, og það er hefð fyrir því að þegar maður fer á Taylor Swift tónleika þá býr fólk til vinaarmbönd, og býttar við aðra. Svo er þeim stundum hent upp á svið og hún setur þau á sig. Við hvöttum bara fólk til að koma með armböndin sín og skiptast á þeim. Svo erum við með fallegt handrið hérna, og það væri gaman að sjá armbönd á því.“

Skemmtilegir tónleikar

En hvernig er tónlistin hjá Taylor Swift?

„Þetta er létt popp og skemmtilegt en oft mjög flottir textar. Maður er búinn að vera að hlusta á lögin hennar á skrifstofunni,“ segir Ólafur og bætir við að tónlistin hennar sé mikil gleðitónlist. 

„Ég er samt enginn sérfræðingur, en ég er mjög spenntur og er búinn að hlusta mikið á hana í aðdragandanum.“

Hann segir að af því að þetta eru svo margar sýningar þá verða margir salir notaðir. Fyrsta sýningin er klukkan sex, og er búin rétt upp úr níu. 

 Ólafur vill hvetja alla til að koma og taka uppáhalds Taylor Swift lögin sín í karaoke. 

„Bara koma í sínum besta gír, standa upp og dansa, syngja og njóta þess að vera á þessum frábæru tónleikum. Það er á hreinu að við hækkum vel í tónlistinni og ég held að fólk muni skemmta sér hvort sem það er Taylor Swift aðdáendur eða ekki, ég er sennilega besta dæmið um það. Ég held að þetta verði rosalega gaman,“ segir Ólafur að lokum.