Katrín Jakobsdóttir forsætisráðherra leit við á starfsstöð HS veitna í dag þar sem boðið var upp á fiskibollur í tilefni dagsins.
Starfsfólkið hefur unnið hörðum höndum að því undanfarna daga að reyna að koma aftur á heitu vatni á Suðurnesjum. Katrín þakkaði fólkinu fyrir og sagði ljóst að þrjátíu þúsund manns á Reykjanesi væru full af þakklæti fyrir framlag starfsfólksins.
Katrín nýtti tækifærið og fékk sér fiskibollur í hádegismatinn í mötuneyti HS veitna. Áður en yfir lauk smakkaði hún líka á sætari bollum sem voru í boði fyrir starfsfólk.
Arinbjörn Snorrason, fulltrúi almannavarna, segir mikilvægt að Suðurnesjamenn séu heima hjá sér og fylgist með þegar verið er að hleypa heitu vatni aftur inn á kerfin eftir viðgerð á Njarðvíkurlögn.
Heitavatnslögnin frá Svartsengi til Fitja er komin í lag og streymir heitt vatn nú inn í hús. Vonast er til að heitt vatn verði komið í öll hús fyrir lok dags og er fólki bent á að vera vakandi fyrir því hvort vatn flæði eðlilega inn í húsin.
