ÍA tekur á móti Fylki á sunnudaginn og nú hefur sú ákvörðun verið tekin að færa leikinn inn í Akraneshöllina. Sömuleiðis mæta Skagamenn liði Tindastóls í Akraneshöllinni, í 32-liða úrslitum Mjólkurbikarsins á fimmtudaginn í næstu viku.
Þar með er áætlað að fyrsti leikurinn á ELKEM-vellinum á Akranesi verði 28. apríl þegar ÍA tekur á móti FH í Bestu deildinni í 4. umferðinni.
Áður höfðu FH og HK víxlað á heimaleikjum þannig að þau mætast í Kórnum á laugardaginn, í stað þess að mætast á Kaplakrikavelli. Áætlað er að fyrsti heimaleikur FH verði því 4. maí, eða ekki fyrr en í 5. umferð.
Leikirnir í 3. umferð
- Föstudagur 19. apríl:
- 19.15 Stjarnan - Valur, Samsungvellinum í Garðabæ
- Laugardagur 20. apríl:
- 14.00 HK - FH, Kórinn í Kópavogi
- 16.15 KR - Fram, AVIS-vellinum í Laugardal
- Sunnudagur 21. apríl:
- 14.00 KA - Vestri, Greifavellinum á Akureyri
- 17.00 ÍA - Fylkir, Akraneshöllin
- 19.15 Víkingur - Breiðablik, Víkingsvöllur
Loks á KR heimaleik við Fram sem færi fram á Meistaravöllum ef veðurguðirnir hefðu verið fótboltafólki hliðhollari, en liðin mætast á AVIS-velli Þróttara í Laugardalnum á laugardaginn.
Á þeim velli verður einnig fyrst „heimaleikur“ Vestra í efstu deild þegar liðið mætir HK í 4. umferð 28. apríl, en áætlað er að fyrsti leikurinn á nýjum heimavelli á Ísafirði verði ekki fyrr en í 7. umferð, þegar Víkingar koma í heimsókn.
Samkvæmt plani er núna fyrsti leikurinn á grasvelli á milli KR og Breiðabliks 28. apríl, en það gæti vel átt eftir að breytast og biðin eftir fyrsta grasleiknum lengst fram í maí.
