Snorri um áhyggju­efni: „Hægt að færa rök fyrir því að án hans værum við í veseni“

Aron Pálmars­son var einn af ljósu punktunum í leik ís­lenska liðsins á nýaf­stöðnu stór­móti. Aron spilaði af miklum krafti og yfir honum var ára leik­manns sem ætlaði sér að gefa allt sitt í verk­efnið.

Þegar kemur að því hvað hafi mest lagt grunninn að þessari spila­mennsku Arons segir Snorri Steinn að hann telji hugar­far Arons spila þar stærsta rullu.

„Ég held að hann hafi bara lagt á sig ein­hverja vinnu. Hann náttúru­lega tekur þetta skref, að fara aftur út, sem ég held að hafi verið mjög jákvætt hvað ís­lenska lands­liðið varðar. Að hann komist aftur inn í þetta at­vinnu­manna­um­hverfi og í þetta stóran klúbb. Það hjálpar mikið til. Hann er í góðu standi, hugsar um sig og ég hef alltaf skynjað að hann brennur fyrir ís­lenska lands­liðið. Það er vel.

Engin spurning að hann var frábær, annað mótið í var hann kannski okkar hættu­legasti sóknar­maður. Það er samt á vissan hátt áhyggju­efni líka. Að menn skuli ekki setja meiri pressu á hann. Það líður þarna ár á milli þar sem að hann er ekki með okkur og ég sem þjálfari myndi vilja sjá menn setja hann undir enn meiri pressu þannig að við værum ekki háðir honum. Ég er ekki að segja að við séum háðir honum en það er alveg hægt að færa rök fyrir því að án hans værum við í veseni.“