Westwood flytur til Bandaríkjamanna

Englendingurinn Lee Westwood hefur ákveðið að flytja til Bandaríkjanna. Hann telur að það muni hjálpa honum að vinna risatitil.

Hinn 39 ára gamli Westwood varð í tíunda sæti á US Open en það var 57. risamótið sem hann tekur þátt í. Westwood viðurkennir að veðurfarið á Englandi eigi einnig þátt í flutningunum.

"Veðrið á Englandi gerir það að verkum að það er ekki hægt að æfa eins mikið óg í Bandaríkjunum. Það eru margar ástæður fyrir þessari ákvörðun og ein þeirra er sú að ég á ekki það mörg ár eftir á toppnum og ég vil gefa sjálfum mér þann möguleika að geta verið þar sem lengst," sagði Westwood sem er í þriðja sæti heimslistans.

Þó svo Westwood flytji yfir hafið ætlar hann samt enn að taka þátt á Evrópumótaröðinni.