„Gunnar Nelson er í fremsta flokki svartbeltinga í brasilísku jiu-jitsu og einn besti gólfglímumaðurinn í veltivigt UFC,“ segir Bandaríkjamaðurinn Joe Rogan.
Rogan, sem er upphaflega virtur og vinsæll grínisti, hefur getið sér gott orð um árabil sem lýsandi á UFC-kvöldum og einn helsti sérfræðingur sambandsins.
Í upphitunarmyndbandi fyrir bardaga Gunnars og Omari Akhmedovs, sem sjá má í spilaranum hér að ofan, fer Rogan stuttlega yfir bardagann og við hverju má búast frá köppunum á laugardaginn.
„Gunnar er einn af þeim bardagamönnum sem mig langar að sjá hvort að geti farið alla leið. En núna mætir hann Akhmedov sem er mjög áræðinn bardagamaður og góður í að rota menn.“
„Akhmedov vill halda bardaganum standandi. Hann mun vilja nota höggin meira og forðast það að fara í gólfið með Gunnari,“ segir Joe Rogan.
Bardagi Gunnars Nelson gegn Omari Akhmedov í O2-höllinni í London á laugardaginn verður í beinni útsendingu á Stöð 2 Sport.
