Spá Fréttablaðsins og Vísis: KR hafnar í 2. sæti

Fréttablaðið og Vísir telur niður í Pepsi-deild karla í knattspyrnu með árlegri spá sinni. Íslandsmótið hefst 3. maí og þar á Stjarnan titil að verja eftir að verða meistari í fyrsta skipti í sögu félagsins.

Fréttablaðið og Vísir spáir KR öðru sætinu í Pepsi-deildinni í sumar og þar með baráttu við FH um Íslandsmeistaratitilinn. KR hafnaði í þriðja sæti á síðustu leiktíð eftir að verða Íslandsmeistari í 26. sinn árið 2013. KR varð bikarmeistari í fyrra í 14. sinn með sigri á Keflavík.

Bjarni Guðjónsson var ráðinn eftirmaður Rúnars Kristinssonar hjá KR en honum til aðstoðar er Guðmundur Benediktsson. Tveir KR-ingar að snúa aftur heim. Fyrsta ár Bjarna sem meistaraflokksþjálfari endaði skelfilega, en hann féll með lið Fram. Bjarni spilaði í sex ár með KR, var fyrirliði liðsins, vann Íslandsmeistaratitilinn tvisvar sinnum og bikarinn þrisvar sinnum.

LÍKLEGT BYRJUNARLIÐ:

EINKUNNASPJALDIÐ

Vörnin: 4 stjörnur (af 5)

Sóknin: 5 stjörnur

Þjálfarinn: 2 stjörnur

Breiddin: 4 stjörnur

Liðsstyrkurinn: 4 stjörnur

Hefðin: 5 stjörnur

ÞRÍR SEM KR TREYSTIR Á

Skúli Jón Friðgeirsson: KR-ingar verða með mjög sterkt miðvarðapar í þeim Skúla Jóni og Rasmus Christiansen. Skúli Jón hefur litið stórvel út á undirbúningstímabilinu, en hann er að snúa aftur eftir þriggja ára dvöl í atvinnumennsku. Rasmus  er að jafna sig eftir krossbandsslit og því þarf Skúli Jón að vera leiðtoginn í nýrri varnarlínu KR.

Pálmi Rafn Pálmason: KR barðist hatrammlega við FH, Val og KA til að landa Pálma Rafni, en hann er að koma aftur heim eftir sjö ár í atvinnumennsku. Pálmi er ekki að koma heim á niðurleið, en síðasta tímabilið hans hjá Lilleström í fyrra var það besta á hans ferli. Miðjan hefur verið mjög sterk og lykillinn í spili KR undanfarin ár. Pálmi Rafn þarf að standa undir væntingum og fylla í skarð Baldurs Sigurðssonar.

Óskar Örn Hauksson: Þvílíkur fengur fyrir KR að fá Óskar aftur heim svona skömmu fyrir mót, en hann var á láni hjá kanadíska liðinu Edmonton. Sóknarleikur KR hefur ekki verið liðinu líkur oft á undirbúningstímabilinu, en hann mun vafalítið lagast með komu Óskars. Njarðvíkingurinn hefur verið lykilmaður hjá KR í mörg ár, en þegar liðið varð meistari síðast fyrir tveimur árum kom hann með beinum eða óbeinum hætti að 20 mörkum liðsins (7 mörk, 7 stoðsendingar, 6 hjálparsendingar).

Nýstirnið: Sören Frederiksen

Þessi 25 ára gamli sóknarmaður kom til KR frá Álaborg í Danmörku þar sem hann varð Danmerkurmeistari og bikarmeistari á síðustu leiktíð. Hann skoraði meira að segja í bikarúrslitaleiknum gegn FC Kaupmannahöfn.

Sören hefur átt erfitt uppdráttar á undirbúningstímabilinu en er að komast í takt við spilið hjá KR. Það eru gæði í Dananum sem bundnar eru væntingar við í Vesturbænum í sumar. Leikmaður sem getur lagt upp mörk og skorað.

MARKAÐURINN

Komnir:

Hörður Fannar Björgvinsson frá Fram

Kristinn Jóhannesson Magnússon frá Víkingi R.

Pálmi Rafn Pálmason frá Lilleström

Skúli Jón Friðgeirsson frá Elfsborg

Sören Frederiksen frá Aab

Rasmus Christiansen frá Ull/Kisa

Jacob Schoop frá OB

Farnir:

Baldur Sigurðsson til SönderjyskE

Egill Jónsson í Víking Ólafsík á láni

Guðmundur Reynir Gunnarsson í Víking Ólafsvík á láni

Haukur Heiðar Hauksson til AIK

Emil Atlason til Þýskalands

KR-ingar misstu mjög sterka leikmenn í þeim Baldri Sigurðssyni og Hauki Heiðari Haukssyni. Haukur var algjörlega frábær á síðustu leiktíð, en það er ekki alltaf sem leikmenn hafa jafn mikil áhrif á lið úr hægri bakvarðarstöðunni.

Guðmundur Reynir Gunnarsson fór einnig til Ólafsvíkur á láni, en það eru bakvarðastöðurnar sem KR-ingar hafa ekki leyst nægilega vel. Þar leitar Bjarni inn á við og ætlar að leysa þetta með Gonzalo Balbi og Gunnari Þór Gunnarssyni. Vesturbæingar eru þó enn að leita að vinstri bakverði.

Framar á vellinum hefur KR styrkt sig mikið. Það er búið að fá tvo öfluga danska leikmenn; Sören Fredriksen frá Danmerkurmeisturum Álaborgar og Jacob Schoop frá OB. Sören hefur verið lengi í gang en lítur betur út og Schoop er góður leikmaður.

Nýtt miðvarðapar er komið með Skúla Jóni, sem þekkir hvern krók og kima í KR, auk Rasmusar Christiansen sem var besti miðvörður Pepsi-deildarinnar þegar hann spilaði með ÍBV. Pálmi Rafn er svo kominn og mun spila í holunni.

KR ætlar sér Íslandsmeistaratitilinn eins og sést á þessum kaupum.

HVAÐ SEGIR SÉRFRÆÐINGURINN?

Pepsi-mörkin fóru af stað á fimmtudaginn með árlegum upphitunarþætti. Þar var KR spáð öðru sæti líkt og á Vísi, en Hjörvar Hafliðason og Hjörtur Hjartarson, sérfræðingar Pepsi-markanna, fóru yfir KR-liðið. Umræðuna má sjá í spilaranum hér að neðan.

STYRKLEIKAR LIÐSINS:

Ótrúlega öflugur mannskapur með stórstjörnur sem ættu að geta klárað leiki upp á sitt einsdæmi. Mikil sigurhefð, sterkur heimavöllur og þekking á að vinna titla. Vel mannað lið nánast í hverri einustu stöðu og leikmenn á bekknum sem kæmust í byrjunarlið flestra annarra liða í deildinni.

VEIKLEIKAR LIÐSINS:

Mikið af nýjum mönnum og óreyndur þjálfari sem á það eitt á ferilskránni að hafa fallið með fyrsta liðið sem hann stýrði. Ekki nógu öflugir bakverðir og varnarlínan alveg ný þó hún sé vel mönnuð. Nái Bjarna ekki að skapa liðsheild úr stjörnum prýddu lið KR gæti liðið lent í vandræðum.

BINNI BJARTSÝNI SEGIR:

Kristinn Kjærnested, formaður knd. KR, sagði það best: „Við erum ekki Fram.“ Það skiptir engu máli þó Bjarni hafi fallið með Fram; hann er KR-ingur og við erum KR. Hann þekkir hvað þarf til að spila vel og standa sig fyrir KR. Sjáið bara innkaupalistann; hvernig á þetta lið ekki að verða Íslandsmeistari?

SIGGI SVARTSÝNI SEGIR:

Leikmennirnir eru góðir sem einstaklingar en er þetta lið? Breiddin er fín en ekkert miðað við atvinnumannaliðið í Hafnarfirðinum. Ég hef alveg trú á að við verðum í baráttunni, ég er ekki svo svartsýnn með þennan hóp. En með óreyndan þjálfara, sama þó hann hafi spilað fyrir KR, höfum við ekkert í FH að gera.