Spá um 5. og 6. sæti í Pepsi Max kvenna: Kanónur kvöddu Selfoss og Stjarnan hreyfist lítið

Íþróttadeild Vísis og Stöðvar 2 Sports spáir fyrir um gengi liðanna í Pepsi Max-deild kvenna í fótbolta en keppni í deildinni hefst með tveimur leikjum þriðjudagskvöldið 4. maí.

Við höfum þegar spáð fyrir um það hvaða fjögur lið verði í neðstu sætum deildarinnar en nú er komið að tveimur liðum sem ættu að enda um miðja deild.

Selfoss hefur breyst mikið frá liðinu sem ætlaði sér í toppbaráttu í fyrra og endaði í 4. sæti. Sannkallaðar kanónur hafa kvatt Selfoss en ferilskrá erlendu leikmannanna sem verða með liðinu í sumar lofar góðu. Minni breytingar eru hjá Stjörnunni sem daðraði ákaft við falldrauginn í fyrra en endaði í 6. sæti.

Stjarnan í 6. sæti: Uppbyggingin mun taka tíma

Stjarnan gekk í gegnum gríðarlega miklar breytingar eftir tímabilið 2018, eftir mikið gullaldarskeið þar sem liðið vann fjóra Íslandsmeistaratitla og þrjá bikarmeistaratitla. Þá hurfu sannkallaðir burðarásar á borð við Hörpu Þorsteinsdóttur og Öddu Baldursdóttur á braut, og þjálfarinn Ólafur Þór Guðbjörnsson lét gott heita.

Síðustu tvö tímabil hefur Stjarnan verið á allt öðrum slóðum og hreinlega daðrað ákaft við fallbaráttu. Þjálfarinn reyndi og klóki Kristján Guðmundsson var fenginn til að sjá um breytingarnar og þróa liðið áfram með efnilegum leikmönnum sem náð hafa góðum árangri í 2. flokki. Stjarnan varð einmitt Íslandsmeistari í fyrra í þeim aldursflokki, í samstarfi við Álftanes.

Garðbæingar munu halda áfram að byggja upp nýtt lið á efnilegum leikmönnum úr starfi félagsins. Lið sem að á ekki roð við bestu liðum landsins í baráttu um titla í nánustu framtíð en virðist geta fetað réttan veg upp á við í átt að fyrri hæðum.

Í sumar getur hins vegar brugðið til beggja vona og liðið virðist á pappírunum heldur hafa veikst frá seinni hluta síðustu leiktíðar. Hópurinn er þó aðeins reyndari en fyrir ári síðan, og liðið of gott og þjálfarinn of fær til að Stjarnan falli.

Síðasta tímabil

Stjörnukonur léku sér að eldinum í fyrra og það munaði minnstu að þær þyrftu að leika í næstefstu deild í sumar, í fyrsta sinn í þrjá áratugi. Á endanum varð liðið tveimur stigum frá fallsæti, eftir að hafa fengið fjögur stig úr síðustu tveimur leikjum sínum.

Þegar komið var fram í ágúst og ljóst að stefndi í óefni nældi Stjarnan í þrautreyndan landsliðsmarkvörð Kanada, Erin McLeod, og ungan, ítalskan landsliðsframherja. Sú ítalska, Angela Caloia, skoraði reyndar bara eitt mark en það var í lífsnauðsynlegum sigri gegn KR undir lok móts, sem á endanum varð til þess að Stjarnan hélt sæti sínu í deildinni.

Liðið og leikmenn

Stjarnan getur að miklu leyti keyrt á sama liði og hóf síðustu leiktíð. Til þess er leikurinn enda gerður, að gefa ungum leikmönnum tíma og tækifæri til að eflast með hverju árinu.

Hin efnilega Jana Sól Valdimarsdóttir er þó farin í Val og sú markahæsta í fyrra, Shameeka Fishley, fór til Spánar. McLeod og Caloia eru einnig horfnar á brott.

Anna María Baldursdóttir ætti að vera heil heilsu og það munar miklu um það fyrir Stjörnukonur að hafa þessa níu landsleikja konu í leiðtogahlutverki. Chanté Sandiford kom frá Haukum og er öflugur markvörður sem þekkir það að spila í efstu deild, í tvö ár með Selfossi, en Stjarnan á reyndar einnig góðan markvörð í Birtu Guðlaugsdóttur.

Heiða Ragney Viðarsdóttir ætti að styrkja miðjuna mikið eftir komuna frá Akureyri, og býr yfir meiri reynslu en margir nýju liðsfélaga hennar, og Alma Mathiesen er snöggur, efnilegur sóknarmaður sem kom frá KR.

Nýsjálenska landsliðskonan Betsy Hassett er áfram á sínum stað, fjölhæf og gæti leikið í fremstu víglínu með hinni efnilegu Hildigunni Ýr Benediktsdóttur sem þarf að finna markaformið sem hún var í 2019, þá aðeins 16 ára gömul.

Gæti sprungið út

Sædís Rún Heiðarsdóttir kom til Stjörnunnar frá Víkingi Ólafsvík fyrir síðasta tímabil og spilaði 13 leiki í efstu deild, 15 ára gömul. Þessi hæfileikaríki, örvfætti varnarmaður hefur leikið ellefu leiki fyrir yngri landslið Íslands, er búin að fá sína eldskírn í efstu deild og gæti látið ljós sitt skína enn frekar í sumar.

Sérfræðingur Pepsi Max markanna segir...

Lilja Dögg Valþórsdóttir sagði sitt álit á liði Stjörnunnar en hún er einn sérfræðinga Pepsi Max markanna sem verða á fimmtudagskvöldum í sumar á Stöð 2 Sport.

Selfoss í 5. sæti: Afar sterk hryggjarsúla horfin en spennandi viðbætur

Selfyssingar settu markið hátt í fyrra, eftir að hafa orðið bikarmeistarar og endað í 3. sæti Pepsi Max-deildarinnar árið á undan. Með eina bestu knattspyrnukonu landsins, Dagnýju Brynjarsdóttur, í broddi fylkingar var jafnvel gælt við Íslandmeistaratitil.

Sú varð þó ekki raunin og mikið vantaði upp á, en Selfoss virtist þó næst Breiðablik og Val að styrk og var eina liðið sem náði að vinna meistara Breiðabliks, og það á Kópavogsvelli.

Selfoss hefur nú fjórða tímabil sitt í röð í efstu deild, undir stjórn Alfreðs Elíasar Jóhannssonar sem stýrði liðinu upp um deild á sínu fyrsta ári með Selfoss, 2017. Hann kom dansandi með leikmönnum yfir Ölfusárbrúna með fyrsta stóra titil liðsins sumarið 2019 og Selfoss stefndi í sömu átt í fyrra þegar liðið sló Val út í 8-liða úrslitum.

Selfoss hefur hins vegar misst marga frábæra leikmenn frá síðustu leiktíð og þó að Hólmfríður Magnúsdóttir hafi hætt við að hætta er ekki að sjá að liðið taki skref upp á við í sumar. Það þarf hins vegar mikið að ganga á til að liðið sogist niður í fallbaráttu.

Síðasta tímabil

Selfoss tapaði fyrstu tveimur leikjum sínum í fyrra og endaði tímabilið með fleiri töp en sigra, þó að niðurstaðan hafi orðið 4. sæti. Liðið tapaði meðal annars báðum leikjum sínum gegn Þrótti og Fylki en sýndi hvað í það var spunnið með 2-1 útisigri gegn Breiðabliki, sem annars hefði endað tímabilið með fullt hús stiga.

Gengi Selfyssinga var einfaldlega allt of brokkgengt til að það ætti nokkurt erindi í toppliðin stöðugu og liðið endaði raunar aðeins sex stigum frá fallsæti en 20 stigum frá toppnum.

Liðið og leikmenn

Selfoss hefur misst sannkallaðar kanónur úr sínu liði frá því í fyrra en fengið til sín sterka erlenda leikmenn til að fylla í skörðin.

Dagný fór til West Ham og Tiffany McCarty til Íslandsmeistaranna. Samtals skoruðu þær 14 af 24 mörkum Selfoss í fyrra. Nýjasta landsliðskonan, Karitas Tómasdóttir, fór einnig til Blika og seint á síðasta tímabil kvaddi landsliðsmiðvörðurinn Anna Björk Kristjánsdóttir og fór til Frakklands. Clara Sigurðardóttir var enn einn öflugi byrjunarliðsmaðurinn sem fór, aftur heim til Eyja.

Ástralska landsliðskonan Emma Checker kemur inn í miðja vörnina með hinni ungu Áslaugu Dóru Sigurbjörnsdóttur sem stimplaði sig vel inn í fyrra. Checker er 25 ára og var í síðasta landsliðshópi Ástralíu, og gæti því misst af hluta af Íslandsmótinu vegna Ólympíuleikanna í sumar.

Brenna Lovera, sem skoraði 6 mörk í 9 leikjum fyrir ÍBV þegar hún lék síðast á Íslandi 2019, ætti að geta tekið við hlutverki McCarty sem helsti markaskorari Selfyssinga.

Markvörðurinn Anke Preuss á að fylla í vandfyllt skarð Kaylan Marckese. Caity Heap er reynslumikill miðjumaður sem spilað hefur í bandarísku úrvalsdeildinni og í Svíþjóð en var síðast hjá tékknesku meisturunum í Sparta Prag.

Selfoss fékk einnig Evu Núru Abrahamsdóttur sem á yfir 100 leiki í efstu deild og kemur frá FH eftir að hafa reyndar fallið með liðinu tvisvar á síðustu þremur árum.

Selfoss er með unga leikmenn í sínum röðum sem gætu fengið eldskírn og eiga afar efnilegan miðvörð í Áslaugu Dóru. Í liðinu eru þó einnig reyndir og góðir leikmenn á borð við Magdalenu Önnu Reimus, sem var kölluð inn í æfingahóp landsliðsins í vetur, Evu Lind Elíasdóttur og fyrirliðann Önnu Maríu Friðgeirsdóttur. Selfyssingar eru því alls ekki á flæðiskeri staddir þó að missirinn í vetur hafa verið mikill.

Gæti sprungið út

Eva Lind Elíasdóttir spilar nú sína fyrstu heilu leiktíð síðan árið 2015. Þessi 26 ára, hávaxni en lunkni, sóknarþenkjandi leikmaður hefur síðustu ár misst af undirbúningstímabilinu og þurft að kveðja snemma vegna háskólanáms í Bandaríkjunum. Þar spilaði hún með liði Kansas Jayhawks.

Eva Lind á að baki 98 leiki í efstu deild og hefur skorað í þeim 14 mörk. Hún gæti mögulega fengið stórt hlutverk í sumar.

Sérfræðingur Pepsi Max markanna segir...

Lilja Dögg Valþórsdóttir sagði sitt álit á liði Selfoss en hún er einn sérfræðinga Pepsi Max markanna sem verða á fimmtudagskvöldum í sumar á Stöð 2 Sport.