Hraun hefur runnið yfir hluta gönguleiðar A upp að gosstöðvunum í Geldingadölum og verður lokað inn á svæðið í dag af öryggisástæðum.
Þetta segir í tilkynningu frá Lögreglustjóranum á Suðurnesjum og Almannavörnum. Viðbragðsaðilar þurfi svigrúm að endurmeta aðstæður. Verið er að leggja nýja gönguleið að gosstöðvunum. Hún liggur samhliða gönguleið A nær alla leið en fer vestur um Fagradalsfjall og er því ekki í vegi hraunflæðisins.
Gosvirknin í eldgosinu í Geldingadölum breyttist nokkuð í morgun og er hraunflæðið nú orðið jafnara en það hefur verið. Strókavirknin er lítil sem engin en náttúruvársérfræðingur hjá Veðurstofu Íslands segir ekki útilokað að strókarnir snúi aftur.
Eitthvað hefur verið um það að ferðamenn við eldgosið í Geldingadölum hafa farið út af merktum gönguleiðum og yfir lögregluborða.
