2. umferð lokið í CS:GO, Dusty, XY og Þór á toppnum

Leikir vikunnar

Leiknir voru fjórir leikir í vikunni eins og vanalega. Á þriðjudaginn tóku ríkjandi meistarar Dusty á móti Sögu. Liðin mættust í Nuke kortinu og aftur tókst Sögu nokkuð vel að standa uppi í hárinu á gríðarlega sterkum andstæðingum. Það dugði þó ekki til og hafði Dusty betur 16-10 eftir spennandi viðureign. Dusty kom sér því fyrir við hlið XY á toppi deildarinnar en Saga á ennþá eftir að komast á blað. Saga þarf að koma sér upp meiri breidd í leikstíl ef liðið ætlar sér að geta séð við reyndari liðum eins og Dusty og XY. Hjá Dusty er allt við það sama, þeir eru ævinlega sigurstranglegri og ljóst að þó StebbiC0C0 leiki ekki lengur með liðinu hefur ekkert dregið úr þeirri sterku heild sem Dusty er og hefur verið.

Síðari leikur þriðjudagskvöldsins var viðureign Kórdrengja og Fylkis, liðanna sem komu upp úr fyrstu deildinni eftir síðasta tímabil. Baráttan sem liðin áttu í þá hélt áfram í Vodafonedeildinni og buðu bæði lið upp á mikla flugeldasýningu í hnífjöfnum leik. Liðin mættust í Inferno kortinu sem þau þekkja bæði vel. Zerq átti stórleik fyrir Fylkismenn í fyrri hálfleik sem Fylkir vann örugglega. Leikurinn snerist þó við og var jafnt eftir venjulegan leiktíma þegar varamaður Kórdrengja kom þeim inn í framlengingu. Fylkir hafði betur að lokum 19-16 og nú reynir á Kórdrengi að þjálfa upp úthald til að geta klárað leiki. 

Tveir leikir fóru svo fram á föstudagskvöldið. Fylkir lék sinn annan leik í umferðinni eftir að hafa setið hjá í þeirri fyrstu og mætti liðið sjóðheitum Þórsmönnum. Liðin mættust í háloftakortinu Vertigo og fóru Þórsarar mun betur af stað og héldu þeir yfirhöndinni út hálfleikinn. Það lifnaði þó yfir Fylkismönnum í upphafi síðari hálfleiks en eftir að liðið náði að jafna skellti Þór í lás og lokaði leiknum 16-11. Þórsarar voru ekki jafn sannfærandi og í fyrsta leik sínum, en er þó með fullt hús stiga eftir tvær umferðir. Fylkismenn þurfa að slípa sig betur saman og samstilla aðgerðir sínar betur í bardögum ef liðið ætlar sér stóra hluti í vetur.

Síðasti leikur umferðarinnar var svo þegar Vallea mætti Ármanni í Nuke kortinu. Aftur var um mjög spennandi viðureign að ræða þar sem bæði lið töpuðu stórt í fyrstu umferð en gátu nú komið sér á blað og upp af botni deildarinnar. Þrátt fyrir nokkuð jafnan leik hélt Ármann pressu á Vallea út viðureignina sem varð til þess að sigrar Vallea reyndust þeim dýrir og þeir gátu ekki veitt eins mikla viðspyrnu og ella. Ármann gerði því vel til að sigra 16-13 og er nú í 4.-5. sæti deildarinnar ásamt Fylki á meðan Vallea er enn stigalaust.

Staðan

Dusty, Þór og XY eru jöfn stiga á toppi deildarinnar, Ármann og Fylkir hafa unnið eina viðureign hvort og sitja fyrir miðju, en á botninum eru Kórdrengir, Saga og Vallea, öll án stiga.

Viðureignir næstu viku er svo sem hér segir:

Saga - Vallea, 19. okt. kl. 20:30.

Þór - Ármann, 19. okt. kl. 21:30.

Fylkir - XY, 22. okt. kl. 20:30.

Kórdrengir - Dusty, 22. okt. kl. 21:30.

Sýnt verður frá leikjunum á Stöð 2 Esport og á Twitch síðu Rafíþróttasamtaka Íslands.