Þingholtsstræti 35 fyrsta uppgerða íbúðarhúsið sem hlýtur Svansvottun

Þegar Gísli Sigurðsson húsgagna- og húsasmiður, keypti húsið í september 2020 var það í afar slæmu ástandi. Gísli setti sér strax það markmið að við endurgerð hússins skyldi horft til þess að fá Svansvottun á allt ferlið en hann rekur byggingarþjónustufyrirtækið Breytingu og voru heimatökin því hæg. Endurgerð á húsinu var unnin í samvinnu við Húsasmiðjuna sem útvegaði allt byggingarefni og tryggði að það stæðist kröfur Svansvottunar.

Elva Rakel Jónsdóttir Sviðsstjóri hjá Umhverfisstofnun:

,,Íslendingar hafa tekið tækifærinu til að umhverfisvotta endurbætur á húsnæði opnum örmum. Þingholtsstræti 35 er fyrsta íbúðarhúsnæðið á Norðurlöndunum öllum sem fær Svansvottun fyrir endurbætur. Með því framsýna skrefi lögðu aðstandendur verkefnisins sitt að mörkum við að sýna fram að á hvernig hægt er að hafa umhverfismál að leiðarljósi við endurbætur og standast kröfur Svansins.“

Meginmarkmið með Svansvottun er að draga úr umhverfisáhrifum bygginga, sporna við hnattrænni hlýnun og vernda heilsu þeirra sem koma að verkinu á framkvæmdartíma og þeirra sem nota bygginguna eftir að hún er tekin í notkun. Svansvottaðar endurbætur skila heilnæmari íverustað og vernda umhverfið.

„Þetta er í fyrsta sinn sem svona verkefni er unnið hér á Íslandi og því sannkallað frumkvöðlastarf hér á ferð,“ segir Magnús Magnússon, markaðsstjóri Húsasmiðjunnar. „Það hefur verið mjög lærdómsríkt fyrir okkur í Húsasmiðjunni að vinna þetta verkefni með Gísla og hans fólki hjá Breytingu sem sá um alla framkvæmd. Ferlið hefur aukið þekkingu okkar starfsfólks á svona verkefnum ásamt því að við höfum nú aukið enn frekar við vöruval hjá okkur í umhverfisvænum lausnum. Til að auðvelda fólki að byrja höfum við gefið út starfrænan vörubækling með mikið af þeim vörum sem við bjóðu upp á sem henta í Svansvottuð byggingaverkefni. Við sjáum að viðskiptavinir okkar kunna vel að meta vörulistann. Við erum sífellt að bæta við vöruvalið og í hverjum mánuði bætast við nýjar vörur og nýjar lausnir hjá okkur. Við bjóðum einnig upp á ráðgjöf hjá umhverfisverkfræðingi, Jóni Þóri Þorvaldssyni, sem starfar hjá okkur á Fagsölusviði og sérhæfir sig í umhverfisvottuðum byggingalausnum.“

Þess má svo geta að mjög auðvelt er að sjá umhverfisvænar eða „Grænar vörur“ í vefverslun Húsasmiðjunnar og í Húsasmiðjuappinu. Þar kemur fram hvaða vottun viðkomandi vara hefur ásamt tækniblöðum og vottunum þar sem það á við.

Endurbæturnar gengu mjög hratt og vel fyrir sig þrátt flókna enduruppbyggingu þurfti töluverðar endurbætur að innan og utan til að færa það til nútímans. Húsið var byggt að grunni til árið 1911 og því mikið breytt árið 1954 og var miðað við það byggingarlag við endurgerðina.