Stjórn Eflingar samþykkti ályktun á fundi fyrr í dag þar sem vinnubrögð ríkissáttasemjara eru fordæmd.
„Ríkissáttasemjari hefur ekki sýnt minnsta áhuga á þvi að kynna sér, greina eða taka mark á vönduðum röksemdum samninganefndar Eflingar sem byggja á staðreyndum og gögnum um félagsmannahópinn og aðstæður hans,“ segir í ályktuninni sem Sólveig Anna Jónsdóttir, formaður Eflingar, greinir frá á Facebook.
Í fréttum Stöðvar 2 sagði Aðalsteinn Leifsson, ríkissáttasemjari, að verði miðlunartillagan samþykkt þá væri hún ígildi kjarasamnings sem gengi þar með framar verkfalli sem fyrirhugað er hjá hótelstarfsmönnum og félagsmönnum Eflingar.
Frétt Stöðvar 2 um málið:
Samningnum þröngvað upp á Eflingu
Í yfirlýsingu Eflingar segir að með miðlunartillögunni eigi að þröngva kjarasamningi Starfsgreinasambandsins og SA upp á félagsfólk Eflingar, „þrátt fyrir að samninganefnd Eflingar hafi ítrekað komið því með málefnalegum hætti á framfæri að sá samningur mætir ekki þörfum félagsfólks og tekur ekki tillit til aðstæðna þeirra.“
Þannig hafi ríkissáttasemjari gert grófa tilraun til að svipta Eflingu samingsrétti sínum.
„Ríkissáttasemjari hefur með vinnubrögðum sínum ekki aðeins svívirt allar hefðir í samskiptum aðila vinnumarkaðarins og unnið orðspori embættisins skaða, heldur hefur beinlínis brotið ákvæði laga um stéttarfélög og vinnudeilur nr. 80 frá 1938 þar sem skýrt er kveðið á um samráð og rými til athugasemda þegar gripið er til þess neyðarúrræðis sem miðlunartillaga er,“ segir í yfirlýsingu Eflingar.
Ekkert neyðarástand skapast
Svipaður er tónninn í yfirlýsingu Alþýðusambands Íslands en þar segir að traust á embætti ríkissáttasemjara hafi skaðast með ákvörðuninni.
„Miðstjórn telur að færa megi rök fyrir og véfengja hvort embætti sáttasemjara hafi með þessum hætti farið út fyrir þær valdheimildir sem embættinu eru settar í lögum um stéttarfélög og vinnudeilur,“ segir í yfirlýsingu ASÍ.
„ASÍ telur heimild til að leggja fram miðlunartillögu vera neyðarúrræði sem takmarkist við að raunverulega hafi öll önnur úrræði verið tæmd og neyðarástand skapast.“ Þar sem verkfallsboðun hafi ekki verið samþykkt af félagsmönnum hafi ekkert neyðarástand skapast.
„ASÍ telur heimild sáttasemjara jafnframt bundna við að átt hafi sér stað náið samráð við aðila um efni hennar og að hún eigi ekki að leggjast fram án þess að hafa a.m.k. þegjandi samþykki beggja aðila. Hvorugt þessara skilyrði sé uppfyllt,“ segir í lok yfirlýsingar ASÍ.
