Íslenski landsliðsframherjinn Orri Steinn Óskarsson þreytti frumraun sína í byrjunarliði Real Sociedad þegar liðið gerði markalaust jafntefli við Real Valladolid í spænsku úrvalsdeildinni í dag.
Real Sociedad keypti Orra frá FC Kaupmannahöfn um mánaðarmótin. Hann kom inn á sem varamaður í fyrstu þremur leikjum sínum með baskneska liðinu en fékk tækifæri í byrjunarliðinu í dag.
Orri komst ekki mikið áleiðis, ekki frekar en aðrir sóknarmenn á vellinum, og var tekinn af velli á 61. mínútu. Liðin áttu aðeins samtals fimm skot á markið í fremur bragðdaufum leik.
Real Sociedad hefur ekki skorað í síðustu fjórum leikjum sínum og er í 16. sæti spænsku úrvalsdeildarinnar með fimm stig.
Næsti leikur liðsins er gegn Nice í Evrópudeildinni á miðvikudaginn.
