Björgunarsveitir í viðbragðsstöðu: Verkefni björgunarsveita um 300 í gær

Lovísa Arnardóttir, Hólmfríður Gísladóttir og Berghildur Erla Bernharðsdóttir skrifa 6. febrúar 2025 08:37

Jón Þór Víglundsson, upplýsingafulltrúi Landsbjargar, segir björgunarsveitir hafa verið vel undirbúnar fyrir lægðina í gær og séu í viðbragðsstöðu fyrir þá næstu. Landsbjörg

Björgunarsveitir sinntu um 300 verkefnum í gær í veðurofsanum sem gekk yfir landið, þar af voru um 200 á höfuðborgarsvæðinu. Slökkvilið sinnti mörgum verkefnum vegna vatnstjóns. Viðbragðsaðilar eru í viðbragðsstöðu vegna næstu lægðar sem fer nú yfir landið. Rauðar og appelsínugular viðvaranir eru í gildi eða munu taka gildi um nær allt land.

„Þetta er náttúrulega bara svo sem eins og í gær; við verðum bara að sjá hvað veðrið færir okkur,“ segir Jón Þór Víglundsson, upplýsingafulltrúi Landsbjargar, um verkefni dagsins. Vonandi verði þau fá eða engin en menn séu í viðbragðsstöðu.

Hann segir björgunarsveitir á höfuðborgarsvæðinu miða við að vera með styttri viðbragðstíma en í gær. Þá voru um 30 þriggja til fjögurra manna hópar að störfum á höfuðborgarsvæðinu og svipað á landsbyggðinni.

„Við erum meðvituð um hvað er að koma og sjáum hvað það færir okkur.“

Foktjón hefur orðið víða. Þessar myndir eru úr innri Njarðvík.

Engin alvarleg slys á fólki

Jón segir gærdaginn hafa gengið vel, miðað við veðurhaminn og fjölda verkefna, sem voru á annað hundrað talsins á höfuðborgarsvæðinu og yfir 300 á landinu öllu.

„Þetta var nú helst kannski bara áhrif vinds sem náði að rífa sig undir og fletta klæðningu af húsum, sprengja upp garðskúra og geymsluskúra, brjóta rúður og fleira í þeim dúr,“ segir Jón um útköll gærdagsins.

Hann segist ekki vita til þess að alvarleg slys hafi orðið á fólki í veðurofsanum. Hann segir ekkert eitt verkefni standa upp úr heldur frekar fjölda verkefna sem ber vott um veðurhaminn.

Jón Þór segir björgunarsveitir ekki hafa fengið tilkynningar um mörg vatnstjón en miðað við tilkynningu frá Slökkviliði höfuðborgarsvæðisins má gera ráð fyrir að slíkar tilkynningar hafi frekar borist til þeirra. Boðanir á dælubíla voru 24 og voru það að mestu leyti útköll tengd veðurofsanum. Sjúkrabílar voru boðaðir í 142 útköll þar af 42 á forgangi.

Veistu meira um málið? Áttu myndir af pollum, vatnselgum eða vatnslekum? Sendu okkur á [email protected].

Röskun á skólastarfi

Vegagerðin ítrekar að ökutæki sem taka á sig mikinn vind eiga alls ekki að vera á ferli milli landshluta í dag. Vegfarendur eru beðnir að fylgjast vel með aðstæðum og vera tilbúnir að breyta ferðaplönum.

Samkvæmt upplýsingum frá lögreglunni á höfuðborgarsvæðinu verður röskun á skólastarfi. Grunn- og leikskólar verða þó ekki lokaðir í borginni, en halda úti lágmarksmönnun. Öllu skólastarfi hefur verið aflýst á Suðurnesjum. Þá fellur niður skólastarf í báðum grunnskólum Fjallabyggðar og leikskólum. Á vef Akureyrarbæjar kemur fram að gert ráð fyrir að leik- og grunnskólar bæjarins verði opnir í dag en skólastarf falli niður í Hlíðarskóla.

Öllum starfsstöðvum menningar- og íþróttasviðs Reykjavíkurborgar hefur verið lokað til að minnsta kosti eitt í dag sem þýðir að meðal annars að sundlaugar Reykjavíkur eru lokaðar.

Hægt er að fylgjast með öllum helstu vendingum af veðrinu í vaktinni hér á Vísi.

Veður Færð á vegum Björgunarsveitir Slökkvilið Óveður 5. og 6. febrúar 2025