Bræður og mamma þeirra svara til saka í tug­milljóna máli

Þrettán karlar og þrjár konur eru ákærð í málinu sem er umfangsmikið eins og sjá má á ákærunni sem telur átta blaðsíður. Þeir yngstu eru á þrítugsaldri, en sá elsti sextugsaldri. Shamsudin-bræðurnir hlutu hvor um sig tveggja og hálfs árs fangelsisdóm í síðasta mánuði fyrir fíkniefnabrot.

Sjá nánar: Samúel Jói og Shamsudin-tvíburarnir á leið í steininn

Að minnsta kosti tveir aðrir sakborningar hafa hlotið þunga dóma. Vygantas Visinskis hlaut fjögurra ára fangelsisdóm árið 2021 í stórfelldu amfetamínmáli. 

Sjá nánar: Sagði 497 sím­töl á 23 dögum tengjast „bíla­við­skiptum“

Gísli Ingi Gunnarsson veitingamaður hefur hlotið dóma bæði í Finnlandi og hér á landi fyrir fíkniefnaviðskipti og fjársvik þegar hann í slagtogi við annan mann sviku vörur út úr Bauhaus.

Sjá nánar: Sak­felldir fyrir fjár­svik gagn­vart Bau­haus

Samanlagt andvirði meints þýfis og muna sem sakborningarnir eru grunaðir um að svíkja út með skjalafalsi eru tæp 31 milljón króna samkvæmt útreikningum fréttastofu.

Sökuð um að falsa undirskriftir og taka út muni

Elías og fjórir sakborninganna, þar á meðal móðirin, eru ákærðir fyrir skjalafals, með því að hafa í fjögur skipti á nokkurra daga tímabili í nóvember 2019 svikið út ýmsar vörur úr verslun Símans í Ármúla með því að leggja fram falsaðar beiðnir í nafni Fiskmarkaðs Suðurnesja. Á meðal þessara muna voru nokkrir Iphone-snjallsímar, tvær Ipad-spjaldtölvur, sjónvarp og tölvuskjár. Samanlagt virði þessara muna mun hafa verið 2,3 milljónir króna.

Í ákærunni segir að Elías hafi falsað undirskrift þessara beiðna sem notaðar voru til að svíkja vörurnar út.

Sagðir hafa skipulagt stólaþjófnað

Tvíburabræðurnir og einn sakborningur til viðbótar eru ákærðir fyrir þjófnað. Þeim er gefið að sök að hafa skipulagt þjófnað á átta stólum úr verslun Svefn og heilsu í Reykjavík. Verðmæti þessara stóla er sagt hafa verið 650 þúsund krónur.

Bræðurnir eru sagðir hafa skipulagt þjófnaðinn, en þriðji maðurinn sagður hafa framkvæmt hann þann 4. nóvember 2020. Jónas og þriðji maðurinn eru síðan sagðir hafa hvor um sig tekið við 40 þúsund króna greiðslu fyrir stólana.

Falið í rafhlöðuhólfi svifbrettis

Jónas og ein konan sem er ákærð eru grunuð um tilraun til fíkniefnabrots með því að standa í innflutningi á 347 grömmum af kókaíni. Í ákæru segir að efnin hafi átt að flytja til landsins í desember 2020 með pakka til konunnar, en þau hafi verið falin í rafhlöðuhólfi svokallaðs svifbrettis (e. hovarboard).

Efnin hafi hins vegar haldlögð af belgískum yfirvöldum, og gerviefnum komið fyrir í staðinn. Nokkrum dögum seinna var pakkinn afhentur konunni.

Með stolna gröfu á stolinni kerru

Einnig eru Elías og annar maður ákærðir fyrir þjófnað. Maðurinn er sagður hafa, þann 14. desember 2020, stolið kerru og gröfu í Reykjavík. Samtals hafi virði kerrunnar og gröfunnar verið níu milljónir króna. Maðurinn er sagður hafa flutt gröfuna á kerrunni í Kópavog þar sem Elías var að byggja fasteign.

Degi síðar er maðurinn sagður hafa stolið kerru, sem var 856 þúsund króna virði, og stolið beltavél, sem var fimm milljón króna virði. Maðurinn er sagður hafa flutt vélina á kerrunni að heimili Elíasar í Grindavík, en þar fundust vélin og kerran.

Keyrði norður með amfetamín í bílnum

Bræðurnir og ein kona eru ákærð fyrir fíkniefnalagabrot. Þann 12. mars 2021 er Elías sagður hafa beðið konuna um að taka fíkniefni, 487 grömm af amfetamíni, úr frysti á heimili þeirra í Grindavík.

Hún hafi gert það og ekið með efnin til Elíasar í Reykjavík. Síðan hafi Elías afhent Jónasi efnin og hann ekið með þau til Akureyrar. Þar var hann handtekinn en fíkniefnin fundust við leit lögreglu í bílnum. Hann er jafnframt ákærður fyrir vörslu rítalíns sem fannst í bílnum, og fyrir hylmingu, en bílnum hafði verið stolið rúmi ári áður.

Sama dag mun lögreglan hafa stöðvað akstur Elíasar og lagt hald á 506 grömm af amfetamíni, og skammbyssu.

Skipulögð sending frá Dóminíska lýðveldinu

Jafnframt eru bræðurnir og tveir aðrir menn ákærðir fyrir tilraun til fíkniefnalagabrots með því að standa í innflutningi á 377 grömmum af kókaíni. Í ákæru segir að fíkniefnin hafi komið hingað til lands með póstsendingu frá Dóminíska lýðveldinu þann 16. mars 2021. Þau hafi verið falin í loki pappakassans sem sendingin kom með.

Í ákærunni segir að Jónas og Elías hafi skipulagt innflutninginn. Elías hafi verið í samskiptum við einstakling í Dóminíska lýðveldinu, og rætt við hann um hversu mikið af efnum yrðu send til landsins og hvernig ætti að greiða fyrir þau.

Þann 2. mars hafi bræðurnir hitt þriðja manninn á skrifstofu sinni í Síðumúla, og gefið honum fyrirmæli um hvernig hann ætti að senda peninga fyrir efnunum til Dóminíska lýðveldisins. Fjórði maðurinn hafi síðan samþykkt að vera skráður fyrir sendingunni og fengið fyrirmæli frá bræðrunum um að sækja hana. Lögreglan hafi þó haldlagt sendinguna áður en til þess kom.

Þrjú mál til viðbótar

Ákært er fyrir þrjú fíkniefnabrot til viðbótar. Bræðurnir og þriðji maður eru ákærðir fyrir að rækta 112 kannabisplöntur í íbúð í Reykjanesbæ.

Bræðurnir og tveir menn til viðbótar eru ákærðir fyrir að flytja 49 grömm af kókaíni til landsins í umslagi frá Mexíkó.

Þar að auki eru Elías og annar karlmaður ákærðir fyrir að sammælast um að flytja 185 grömm af kókaíni til landsins, en þau munu hafa verið falin í botni pappakassa sem kom frá Hollandi.

Doka-plötur, timbur og þakpappi fyrir margar milljónir

Að lokum eru mennirnir ákærðir fyrir nokkur þjófnaðarbrot, með því að stela svokölluðum doka-plötum og öðrum hlutum af ýmsum vinnusvæðum í september og október 2020. Um var að ræða fimm tilfelli, en miðað við ákæruna var virði þýfisins í fyrstu fjórum málunum samanlagt rúm milljón. 

Í fimmta málinu, þar sem þeim er gefið að sök að stela doka-plötum, þakpappa og timbri, er áætlað virði þýfisins 12 milljónir króna.

Tvíburabræðurnir eru þar að auki ákærðir fyrir peningaþvætti, með því að selja doka-plöturnar. Sex sölur eru tilgreindar í ákæru fyrir samtals eina milljón króna.

Þá er einn maður ákærður fyrir að kaupa 125 dokaplötur á 312 þúsund, en í ákæru segir að honum hefði ekki getað dulist að um þýfi væri að ræða.

„Ég er mannlegur“

Elías Shamsudin tjáði sig um rannsókn lögreglu á málinu í viðtali við Stöð 2 árið 2022. Þá gagnrýndi hann að lögreglu fyrir að hlera sig.

„Ég hef verið hleraður síðan 2019 til dagsins í dag. Vonandi er það hætt. Og jú, ég er mannlegur skilurðu, ég æsist og verð reiður og sár og svekktur og græt og allt þetta, bara eins og venjulegur maður gerir. Hvernig sem samræður eru, viðeigandi eða óviðeigandi og að vita að það sé bara verið að hlusta á þetta, það er óþægilegt,“ sagði Elías.

Sjá má umfjöllun Stöðvar 2 um málið hér fyrir neðan.