Leikurinn á King Power leikvanginum var aðeins tveggja mínútna gamall þegar Jacob Murphy kom Newcastle yfir. Hann bætti öðru marki við á 11. mínútu og Harvey Barnes skoraði svo þriðja mark gestanna á 34. mínútu. Fleiri urðu mörkin ekki og Skjórarnir fögnuðu öruggum sigri.
Leicester hefur nú tapað átta heimaleikjum í röð án þess að skora. Það hefur ekkert lið í fjórum efstu deildunum á Englandi gert.
Árangur Leicester á heimavelli á tímabilinu er vægast sagt afleitur. Liðið hefur aðeins unnið tvo af sextán deildarleikjum sínum á King Power, gert þrjú jafntefli og tapað ellefu. Leicester hefur ekki skorað á heimavelli í 720 mínútur, eða síðan 8. desember á síðasta ári.
Leicester hefur tapað fimmtán af síðustu sextán leikjum sínum og fallið blasir við Refunum. Þeir eru með sautján stig í nítjánda og næstneðsta sæti deildarinnar, fimmtán stigum frá öruggu sæti þegar sjö umferðir eru eftir.
Southampton féll á sunnudaginn og Ipswich Town er einnig í afar erfiðri stöðu, tólf stigum frá öruggu sæti. Því bendir allt til þess að allir þrír nýliðarnir falli strax aftur niður í B-deildina.
Steve Cooper var rekinn frá Leicester í lok nóvember og við starfi hans tók Ruud van Nistelrooy. Hann hefur stýrt Leicester í tuttugu deildarleikjum en í þeim hefur liðið aðeins fengið ellefu stig.
