Kirsu­berin komu til baka og stálu sigri af Skyttunum

Arsenal komst yfir en tapaði 1-2 gegn Bournemouth í 35. umferð ensku úrvalsdeildarinnar. Miðvörðurinn Dean Huijsen jafnaði um miðjan seinni hálfleik og Evanilson skoraði sigurmarkið skömmu síðar.

Declan Rice komst í fyrsta færi leiksins eftir fimmtán mínútur en skaut framhjá. Hann var sparkvissari eftir rúmlega hálftíma leik og skoraði eftir stungusendingu Martin Ödegaard.

Leikurinn hafði verið mjög opinn fram að markinu og bæði lið farið illa með fín færi.

Bournemouth var síðan næstum því búið að jafna fyrir hálfleik en skot Justins Kluivert kom við varnarmann og Arsenal hélt forystunni.

Um miðjan seinni hálfleik var Antoine Semenyo skipt inn á hjá Bournemouth og hann tók sér aðeins tvær mínútur í að hafa áhrif á leikinn, með löngu innkasti sem rataði til Dean Huijsen sem skoraði með kollspyrnu.

Gestirnir skoruðu svo annað mark skömmu síðar, í þetta sinn upp úr hornspyrnu. Marcus Tavernir átti skalla, sem virtist vera að fljúga framhjá en Evanilson var vel staðsettur og stýrði honum í netið.

1-2 lokaniðurstaðan og fyrsti sigur Bournemouth á útivelli gegn Arsenal staðreynd. Bournemouth færir sig upp í áttunda sæti með sigrinum, sjö stigum á eftir Aston Villa í sjöunda sætinu. Arsenal er enn í öðru sætinu, þremur stigum á eftir Manchester City.