VAR tók tvö mörk af Perú

Venesúela og Perú gerðu markalaust jafntefli í A-riðli Suður-Ameríkukeppninnar í fótbolta í kvöld.

Christofer Gonzales kom boltanum í netið fyrir Perú strax á sjöundu mínútu en eftir myndbandsdómgæslu var markið dæmt af vegna rangstöðu.

Perú var ekki hætt að setja boltann í netið því á 64. mínútu var aftur mark dæmt af vegna rangstöðu, aftur með hjálp myndbandsdómgæslunnar.

Á 75. mínútu fékk Luis Mago sitt annað gula spjald og var sendur í sturtu. Venesúela spilaði því síðasta korterið manni færri.

Mörkin tvö voru tvö af örfáum markverðum atvikum í annars bragðdaufum leik.

Liðin eru bæði komin með stig í riðlinum, Brasilía situr á toppnum með þrjú stig en Bólivía á botninum án stiga.