Ekkert elsku mamma þegar snjóar í Bláfjöllum

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Klukkan 6:50 en dett annað slagið í morgunæfingar og vakna þá um sex, mis-eldhress. Jú, annars, alltaf í góðu skapi.

Um helgar sef ég aðeins lengur, hreyfi mig og nýt þess verulega að fá mér góðan kaffibolla. En þegar snjórinn er kominn í Bláfjöll þá er ekkert elsku mamma heldur brunum við í fjallið og erum mætt fyrir tíu."

Hvað er það fyrsta sem þú gerir á morgnana?

„Ég græja mig, annað hvort í bankagallann eða hjólagallann ef ég ætla að hjóla í vinnuna. Svo er alltaf morgunmatur og ég renni yfir blöðin sem ég geri á gamla mátann, og gleymi ekki D-vítamíninu á veturna. Ég fæ mér fyrsta bollann í vinnunni og hann er sérstaklega góður.“

Af föstum jóla-hefðum í þínu lífi, hvaða hefð finnst þér alltaf skemmtilegust?

„Í sannleika sagt finnst mér best að slaka á og hreyfa mig um jólin, í jöfnum hlutföllum. 

En af jólahefðum þá held ég í að senda út alvöru jólakort, með mynd af fjölskyldunni eða börnunum. 

Ég verð sjálfsagt ein eftir með þessa hefð. 

En svo á ég líka jólakortin með myndum sem ég hef fengið, alveg frá upphafi, hvert eitt og einasta.“

Í hvaða verkefni ertu að vinna helst í þessa dagana?

„Það er svakalega mikið um að vera alls staðar núna og það þarf því að vera á tánum og sjá til þess að allir í bankanum hafi það sem þarf til að mæta tækifærum og sinna viðskiptavinum. 

Stóra verkefnið mitt akkúrat núna er viðskiptaáætlun næstu þriggja ára. Það er árlegt jólakraftaverk að klára þá vinnu en jafnframt er ég alveg gríðarlega stolt af því sem fer inn í áætlunina og hvernig við náum að samstilla bankann. 

Þessi vinna verður alltaf betri og það er sérstaklega gaman að vera að vinna undir nýju stefnunni okkar, Landsbanki nýrra tíma. 

Okkar meginhlutverk er að einfalda viðskiptavinum lífið. Það sem er svo skemmtilegt er að við getum öll tengt við það að einfalda lífið og svo heimfærum við það á það sem hver og einn gerir.“

Hvernig skipuleggur þú þig í vinnu?

„Góð spurning! Bankarekstur er mjög öguð starfsemi og flestar ákvarðanir eru teknar á fundum þar sem mál eru lögð fyrir. Þetta virkar mjög stíft en er gríðarlega skilvirkt ef vel er á málum haldið. 

Ég er með svona 3+2 skipulag, þrír fyrstu dagarnir í vikunni í reglulega og fasta fundi, og tveir dagar til að grípa annað, hugsa, hitta fólk, læra og plana.

Svo er ég alveg hætt að vera týpan sem þolir ekki að eiga ósvaraða tölvupósta, það bítur ekki á mig lengur! Fólk hringir þá bara ef málið er mikilvægt.“

Hvenær ferðu að sofa á kvöldin?

„Alltaf seinna en ég vil en um leið og ég get en það er ófrávíkjanleg regla að taka fyrst til vinnufötin og ræktar- eða tennisfötin. Það eitt og sér er það besta sem ég get gert til að undirbúa næsta dag, fyrir utan að lofa að fara fyrr að sofa á morgun.“