Nú styttist óðum í Hlustendaverðlaunin 2023 sem fara fram 17. mars næstkomandi. Nýliði ársins er meðal verðlaunaflokka og eru átta hljómsveitir og tónlistarmenn sem keppast um titilinn. Lífið á Vísi ræddi við allt tónlistarfólkið sem var tilnefnt í þessum flokki og fékk smá innsýn inn í sköpunargleði þeirra og tónlist.
Viðtalið má sjá í spilaranum hér að neðan, þar sem Kvikindi deila meðal annars mjög fyndinni gigg sögu:
Hver eruð þið með eigin orðum?
Kvikindi er lítið dýr sem borar sig í eyrun þín, hreiðrar þar um sig og nærist á eyrnamerg og heilafrumum.
Við erum sérfræðingar í rafpoppi og einsetjum okkur að koma fólki til að dansa í gegnum tárin, finna stelpulegu hliðina og elska meira.
Við sem persónur erum svo Brynhildur Karlsdóttir söngkona, laga- og textahöfundur, Friðrik Margrétar- Guðmundsson lagahöfundur og útsetjari með meiru og með í för er Valgeir Skorri Vernharðsson trommari.
Hvernig mynduð þið lýsa ykkar tónlistarstíl?
Hann er ekki við eina fjölina felldur heldur vitnar í allar áttir kannski svipað og ef gervigreind væri látin semja verðlaunapopp í mörgum stílum en þó erum við einnig með óhemju miklar tilfinningar.
Hver var kveikjan að því að þið byrjuðuð í tónlist?
Við fengum engu um það ráðið, sumt bara gerist og annað, eins og til dæmis tónlist, er alltaf viðloðandi líf okkar.
Tónlistin er eins og herpes að því leyti, eða meðvirkni, eða Bónus.
Við Friðrik vissum af hvoru öðru og okkur fannst áhugavert að prófa að gera popptónlist saman, hann að koma úr klassíska tónlistarheiminum og ég að koma úr pönki.
Hvað er það skemmtilegasta við að vinna í tónlist?
Að fá að vinna með besta vini sínum og sjá hugmyndir sínar verða að veruleika og að fá að vera miðdepill athyglinnar eina og eina kvöldstund.
En erfiðasta?
Það er ekkert erfitt við tónlist nema að fá pening fyrir hana.
Er eitthvað við tónlistarbransann sem hefur komið ykkur á óvart?
Já það kom okkur alveg í opna skjöldu hvað þetta er harður heimur og mörg brögð í tafli, það er erfitt að sjá hverjir eru traustir og hverjir leika tveimur skjöldum, eina stundina eru það blómvendir og þá næstu eru það rýtingar. Það þarf bein í nefið til að harka þetta af sér en hér erum við. Djók.
Ætli það komi ekki skemmtilega á óvart allt fólkið sem gefur sér tíma til að hlusta, mæta á tónleika og pæla í tónlistinni sem við gerum. Maður vonar alltaf að fólk hlusti en það er alls ekki sjálfsagt þegar framboðið er endalaust.
Drauma samstarfsaðili?
Björk Guðmundsdóttir. Númer eitt, tvö og þrjú. Eftir henni KefLavík, ClubDub, Mammút og Bríet.
Eigið þið einhverja íslenska fyrirmynd í tónlistarheiminum?
Aftur elskum við Björk Guðmundsdóttur en hún hlýtur að vera fyrirmynd flests tónlistarfólks á íslandi.
Bríet er frábær tónlistarkona og fær í að blanda saman miðlum og listformum á borð við dans, tísku og myndböndum sem er eitthvað sem við viljum gera, tónlistin getur sameinað margt.
Við elskum Mammút og höfum alltaf gert og KefLavík hefur líka veitt okkur mikinn innblástur enda tímalaus snilld þar á ferð.
Hvernig var tilfinningin að fá tilnefningu sem Nýliði ársins?
Við vorum alveg í skýjunum með þessa tilnefningu og bara yfir höfuð með viðbrögðin við okkur og plötunni okkar. Við erum spennt fyrir framhaldinu, gefa út fleiri lög og spila fleiri tónleika.
